Beıbit jıyndar týraly zań jobasy qoǵamnyń damýyna óz úlesin qosady - qaýymdastyq tóraǵasy

ShYMKENT. QazAqparat – Elimizde talqylanyp jatqan beıbit jıyndar týraly zań jobasy qoǵamnyń damýy bir qadam alǵa jyljyǵanyn kórsetedi. Bul týraly «Shymkent qalasynyń Azamattyq Alıansy» qaýymdastyǵynyń tóraǵasy Jumaǵalı Bilisbekov aıtty, dep habarlaıdy QazAqparat tilshisi.

«Búgingi zań jobasynyń burynǵysynan ereksheligi, ár túrli mıtıngke shaqyrǵan kisilerdiń quqyqtary men oǵan qatysýshylardyń qaýipsizdigin qamtamasyz etý qarastyrylǵan. Jergilikti turǵyndarǵa da zııan keltirmeý sııaqty máseleler de qaralǵan. Degenmen mıtıng ótkizemin deýshilerdiń ótinishin qabyldaıtyn, olarǵa jaýap beretin bir ókiletti organ qurý kerek dep esepteımin. Ol organ quramynda qoǵam qaıratkerleri, qoǵamdyq keńes músheleri, úkimettik emes uıymdardyń ókilderi bolǵany durys. Top musheleri birge aqyldasa otyryp, mıtıngke shyqqysy keletinderdiń máseleleri qandaı alańda, qandaı deńgeıde talqylanýy kerektigin anyqtaı alady»,- deıdi Jumaǵalı Bilisbekov.

Qaýymdastyq tóraǵasy zań jobasyna qatysty usynystaryn da bildirdi.

«Zań jobasynda mıtıng ótkizetin tulǵalardyń jaýapkershiligin aldyn ala belgilep alý kerek. Sondaı-aq qala turǵyndarynyń qaýipsizdigin qamtamasyz etý, jol erejesin buzbaý, ınfraqurylym men sanıtarlyq normalardy saqtaýdy engizý qajet. Biz qaýymdastyq tarapynan óz usynystarymyzdy joldadyq»,- deıdi Jumaǵalı Bilisbekov.