Beıbit jıyn týraly zań demokratııalyq baǵyt ustanǵan elge qajet - Irına Terenteva

KÓKShETAÝ. QazAqparat - Elimizde qoǵamdyq talqylaýǵa shyǵarylǵan «Qazaqstan Respýblıkasynda beıbit jıyndar, sherý, pıketter, demonstratsııalyq jınalystardy ótkizý men uıymdastyrý tártibi týraly» zań jobasy demokratııalyq baǵyt ustanǵan el úshin qajet. Bul týraly «Aqmola oblysynyń azamattyq alıansy» zańdy tulǵalar birlestiginiń tóraıymy Irına Terenteva aıtty, dep habarlaıdy QazAqparat tilshisi.

Onyń aıtýynsha, árbir zań – jańa múmkindik. Zańnyń aýqymy men ózektiligi, qoldaný aıasy qoǵamnyń talqysyna baılanysty.

«Qoldanystaǵy zań sonaý 1995 jyly qabyldanǵan. Sondyqtan, ol zań qazirgi talaptarǵa jaýap bere almaıdy. Jańa zań jobasynyń burynǵysynan ereksheligi - endi mıtıng ótkizý úshin eń aldymen ruqsat alý máselesi emes, mıtıngige qansha adam qatysatyny, qaı jerde ótetini, qandaı másele kóteriletinin eskertip aıtý jaǵy qaralady. Bul - memleket úshin de, qoǵam úshin de mańyzdy»,- deıdi Irına Terenteva.

Osy rette ol usynylyp otyrǵan «Qazaqstan Respýblıkasynda beıbit jıyndar, sherý, pıketter, demonstratsııalyq jınalystardy ótkizý men uıymdastyrý tártibi týraly» zań jobasynda beıbit jıyndardy uıymdastyrýshylar men qatysýshylardyń, jýrnalısterdiń quqyqtary men mindetteri naqtylanǵanyn alǵa tartýda.

«Jańa zań jobasynda uıymdastyrýshylar men qatysýshylardyń, sondaı-aq, memlekettik organdardyń jaýapkershiligi qarastyrylǵan. Bul árıne, memlekettik organdardyń halyqpen baılanysyn nyǵaıtyp, kez kelgen máseleni mıtıngi arqyly emes, ashyq dıalog arqyly sheshýge ıtermeıleıdi. Sondyqtan, búgingi kúni osyndaı zań ásirese, demokratııalyq baǵyt ustanǵan el úshin qajet», - dep túıindedi Irına Terenteva.