Beıbit jınalystar úshin arnaıy oryn belgilengenin jaqtaımyn - Marat Bashımov
«Qoldanystaǵy zań osydan 25 jyl buryn 1995 jyl qabyldanǵan edi. Ol búginde moraldyq turǵyda eskirdi jáne quqyqtyq normalar qazirgi ýaqytta oryn alyp otyrǵan shynaıy jaǵdaıǵa sáıkestendirý qajet. Al búgingi tanystyrylyp jatqan zań jobasy osy olqylyqtardyń ornyn toltyrady», - dedi ol.
Osy rette Marat Bashımov Májiliste tanystyrylyp jatqan «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrýlar engizý týraly» zań jobalary kóptegen máselelerdi sheshetindigin aıtady.
«Arnaýly oryndardy belgileýdi jaqtaýymnyń sebebi osydan 100 jyl buryn kóshelerde mashına bolǵan joq, ýaqyt ózgerdi. Qazir adamdar emin-erkin shyǵyp, bılikke óz talabyn jetkize alady. Erterekte uıaly telefondar bolmady. Sondyqtan adamdar ortalyq kóshelerge shyǵyp, talaptaryn qoıdy. Biraq, qazir ýaqyt ózgerdi. Adamnan kólik kóp, aqparattyq tehnologııalar damyǵan. Búginde ereýil arqyly adamdarǵa búkil álemde ne bolyp jatqanyn jetkizý túk emes. Al beıbit jınalystar ótkizý úshin arnaýly oryn belgileý eń aldymen qaýipsizdik úshin kerek. Arnaýly orynda barlyq ınfraqurylym bolady», - dedi Marat Bashımov.
Osy rette ol AQSh, Ulybrıtanııa, Germanııa, Shvetsııa, Japonııa elderinde beıbit jıyndardy ótkizý eskertý arqyly júrgizilgenimen kelisý ınstıtýty bar ekendigin basa aıtty.
«Atalǵan elderdiń zańdarymen bul máseleler rettelgen. Ózge adamdardyń quqyǵy bastalǵan jerde seniń quqyǵyń aıaqtalady. Zań tilimen aıtsaq, bul Konstıtýtsııanyń 5-bólimi, 12-baby jáne Adam quqyqtary týraly halyqaralyq paktiniń 24-baby. Bul rette mıtıngide óz quqyǵyńdy júzege asyrý ózgelerdiń quqyǵyn buzbaýy tıis. Mıtıngige qatyspaıtyn adam zardap shekpeýi qajet», - dedi Marat Bashımov.