Beıbit jınalystar týraly zań jobasyndaǵy grammatıkalyq qateler túzetildi

NUR-SULTAN. QazAqparat - Aqparat jáne qoǵamdyq damý mınıstrligi «Qazaqstan Respýblıkasynda beıbit jınalystardy uıymdastyrý men ótkizý tártibi týraly» jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda beıbit jınalystardy uıymdastyrý men ótkizý tártibi máseleleri boıynsha ózgerister men tolyqtyrýlar engizý týraly» zań jobalary mátinindegi grammatıkalyq qatelikterge qatysty túsinikteme berdi.

Mınıstrlik Qazaqstan Respýblıkasynyń «Normatıvtik quqyqtyq aktiler týraly» Zańynda jáne zań jobalaý jumysyn uıymdastyrý qaǵıdalarynda zań jobalaryn ázirleý kezinde saqtalatyn naqty erejeler qarastyrylǵanyn atap ótken.

«Mindetti talaptardyń biri - zań jobalaryn ǵylymı-lıngvıstıkalyq saraptaý. Bul jaǵdaılar beıbit jınalystar týraly zań jobalaryn ázirleý kezinde eskerildi, zań jobalarynyń mátini Parlamentte talqylanýǵa deıin eki ret qajetti tekserýler men lıngvıstıkalyq saraptamadan ótti. Ǵylymı-lıngvıstıkalyq tekserýler nátıjeleri boıynsha barlyq eskertýler eskerilip, qateler túzetildi» dep jazylǵan habarlamada.

Málimetke saı, zań jobalary Parlamentke usynylǵan kezde olarǵa ilespe qujattar, onyń ishinde ǵylymı-lıngvıstıkalyq saraptama qorytyndylary qosa beriledi. Anyqtalǵan qatelikter týraly aqparat beıbit jınalystar týraly zań jobalarynyń bastapqy nusqasyna qatysty, zań jobalary Parlamentke jiberilgenge deıin bul qateler joıyldy.