Beıbit jınalystar týraly zań jobasy halyqaralyq tájirıbege saı – sarapshy
«Qarastyrylyp otyrǵan jańa zań jobasy halyqaralyq tájirıbege sáıkes jazylǵan. Osy oraıda halyqaralyq-quqyqtyq qujattarǵa aıtarlyqtaı úlken taldaý júrgizildi, onyń ishinde sheteldegi tıisti zańdardaǵa normalar qaraldy. Atap aıtqanda, Ulybrıtanııa, AQSh, Frantsııa, Germanııa jáne ózge de elderdiń tájirıbesi qarastyryldy», - dedi S. Amanjyqova tilshilerge bergen suhbatynda.
Sonymen qatar sarapshy usynylǵan zań jobasy barlyq talaptarǵa sáıkes keletindigin jetkizdi.
«Shetel zańnamasy mıtıngilerge qatysýshylardyń, uıymdastyrýshylardyń úlken jaýapkershiligin eskergen. Bul óz kezeginde Qazaqstan Respýblıkasy memleketi men azamattarynyń ózara jaýapkershiliginiń konstıtýtsııalyq-quqyqtyq qaǵıdasyna sáıkes keletinin atap ótken jón. Eger memleket atalǵan shara elimizdiń zańnamasy talaptaryna sáıkes ótkiziletinine jaýap berse, onda uıymdastyrýshylar da, jınalysqa qatysýshylar da Qazaqstannyń zańdaryn oryndaıtyndyǵyna jaýapty bolsa, bul jaǵdaı halyqaralyq tájirıbege saı keledi», - dedi professor.
Aıta keteıik, búgin Parlament Májilisinde «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasy tanystyryldy.
QR Aqparat jáne qoǵamdyq damý mınıstri Dáýren Abaevtyń sózine qaraǵanda, qujat jobasynda beıbit jınalystardy uıymdastyrýshylardyń, qatysýshylardyń quqyqtary men mindetteri naqty aıqyndalady.
«Uıymdastyrýshylardyń, qatysýshylardyń quqyqtary men mindetteri naqty aıqyndalatyn bolady. BAQ salasyndaǵy ókiletti organ beıbit jınalystarǵa qatysatyn jýrnalıst qyzmetiniń erejesin, jýrnalıstik aıyrmashylyq belgisi pishinin qabyldaıtyn bolady. Uıymdastyrýshylar úshin beıbit jınalystardy ótkizýdiń yńǵaıly bolýy maqsatynda uıymdastyrýshylardyń aıyrmashylyq belgileriniń pishini qabyldanady», - dedi Dáýren Abaev.