Beıbit zamanda baqytty balalardyń kúlkisin kórdim - júz jastaǵy qyzylordalyq maıdanger

QYZYLORDA. QazAqparat - Qyzylorda oblysynda júz jasaǵan qart maıdanger ıAhııa Tasyrov bıyl Jeńistiń 77-shi kóktemin qarsy aldy, dep habarlaıdy QazAqparat tilshisi.

ıAhııa Tasyrov 1922 jyly Tereńózek aýdanynda dúnıege kelgen. Soǵys jyldary artıllerııa áskerı kúshteri quramynda Stalıngrad, Kýrsk qalalary men Belarýs, Polsha, Germanııa elderindegi urysqa qatysqan. Erligi úshin kóptegen orden jáne medaldi keýdesine taqty. Ǵasyr-ǵumyr jasaǵan aqsaqal Syrdarııa aýdanynyń Qurmetti azamaty atanǵan.

Reseı jerinde jaýmen shaıqasqan ol stanokty pýlemetti oqtaýshy bolyp júrdi. En dalada 70 keli salmaqty arqalap, talaı ret urystyń bel ortasyna tústi.

Ǵasyr kýágeri bereke-birlik bar jerde ǵana istiń alǵa basatynyn, jastardyń beıbit kúnde týǵan eline adaldyqpen, janashyrlyqpen qaraýy qajet ekenin aıtady.

«Zaman jaqsy, balalarym, biz tek sony baǵalaı bilýimiz kerek. Biz kórgen ashtyq, qandy soǵys, beınetke toly kúnder sol kúıi artta qalsyn. Dushpanyma da tilemeımin. Beıbit zamanda baqytty balalardyń kúlkisin kórdim. Oǵan da shúkir. Qazaqstannyń Táýelsizdigi máńgilik bolyp, pıǵyly jamandardyń kesirinen el irgesi buzylmasyn», - dedi ardager.

1945 jyly tamyzdyń aıaǵynda elge oralǵan ol kisi aýdan ortalyǵyndaǵy sút zavodynda qoıma meńgerýshisi bolyp taban aýdarmaı on alty jyl eńbek etti. 1960 jyly Jalaǵashtyń sút zavodynda master, 1982 jyly aýdan ortalyǵyndaǵy astyq qabyldaý pýnktinde jumys istep zeınetkerlikke shyqqan.

Qart maıdanger áli de túrli is-sharalarǵa belsene qatysyp keledi. Jerlesteri ol kisini árdaıym qurmet tutady.