Beıbit Ystybaev bıylǵy «Qazaqstan Barysynan» óz erkimen bas tartty - Sársen Quranbek
- Osymen jetinshi márte jalaýy jelbiregeli otyrǵan qazaq kúresinen «Qazaqstan Barysy» týrnıriniń fınalyna joldama alǵan balýandar tolyǵymen anyqtaldy. Biz dástúr boıynsha aldymen aýyldyq, aýdandyq, odan keıin oblystyq beldesýlerden iriktelip shyqqan balýandarǵa ǵana fınaldyq aıqasqa joldama berdik. Endi, shildeniń 2-si kúni elimizdiń 14 oblysy men Astana, Almaty qalalarynda jeńimpaz atanǵan 34 balýannyń ishindegi eń myqtysyn, ıaǵnı «Qazaqstan Barysy-2017» ataǵynyń ıegeri kim bolatynyn elorda turǵyndary men qala qonaqtary óz kózderimen kóretin bolady. Múmkin bıyl jańa chempıon shyǵyp qalýy da ǵajap emes. Úsh ret «Qazaqstan Barysy» atanǵan Beıbit Ystybaev bıyl óz erkimen týrnırge qatysýdan bas tartty.
- Ne sebepti bas tartqany týraly tolyǵyraq aıtyp ótseńiz...
- Ol buryndary úsh dúrkin «Qazaqstan Barysy» atansam boldy dep aldyna maqsat qoıǵan. Sol degenine qol jetkizdi. Alǵash ret 2012 jyly chempıon atansa, araǵa eki jyl salyp, 2015 jáne 2016 jyldary qatarynan bas beldikti qanjyǵasyna baılap, úsh dúrkin jeńimpaz ataǵyna qol jetkizdi. Bıyl demalaıyn degen bolý kerek. Bul týrnırge qatysý-qatyspaý ár balýannyń óz erki. Eshkim-eshkimdi kúshpen jarysqa qatystyrmaıdy. Sondyqtan biz Beıbittiń sheshimine kelisim berdik.
- Kelesi jyly qaıta qatysamyn dese de óz erki ǵoı...
- Árıne! Biraq, kelesi jyly qatysamyn dese, ózge balýandar sııaqty irikteýge qatysyp, oblystyq jarysta jeńip shyǵýy kerek. Al bıyl ótken jyly chempıon bolǵany úshin irikteýden tys qatysýǵa múmkindigi bar edi. Alaıda, óz erkimen jarysqa qatysýdan bas tartyp otyr.
- «Qazaqstan Barysy» týrnırinen keıin «Álem Barysy» halyqaralyq týrnıri ótetinin bilemiz. Múmkin Beıbit sol dodaǵa daıyndalyp jatqan bolar...
- Oǵan Beıbittiń qatysý-qatyspaýyn bapkerler keńesi anyqtaıdy. Ony Beıbit ózi sheshpeıdi.
- Áńgimeńizge rahmet!