Beıbit Shúmenov «GGG-Kanelo» revanshy týraly: Jeńimpazdy boljaý qıyn

ASTANA. QazAqparat - Kásibı boksta eki salmaq sanaty boıynsha álem chempıony atanǵan tuńǵysh qazaqstandyq sportshy Beıbit Shúmenov mamyr aıynda ótetin boks áleminiń basty oqıǵasy - Gennadıı Golovkın (37-0-1, 33 KO) men Saýl Alvarestiń (49-1-2, 34 KO) qarymta kezdesýi týraly óz pikirin bildirdi, dep habarlaıdy QazAqparat tilshisi.

«Golovkın men Alvarestiń aıqasyna keler bolsaq - ekeýi de laıyqty boksshylar. Qaısysynyń jeńimpaz atanatynyn aıtý qıyn. Tipti ózim de bul karymtany asqan qyzyǵýshylyqpen kútip júrmin», - dep jaýap berdi boksshy Ortalyq kommýnıkatsııalar qyzmetinde ótken brıfıngte jýrnalıster saýalyna.

Qazaqstandyq boksshy men meksıkalyq sportshynyń arasyndaǵy revanshtyq kezdesý aǵymdaǵy jyldyń 5 mamyry kúni ótedi dep kútilýde. Eske sala ketsek, 2017 jyldyń 16 qyrkúıegi kúni Las-Vegasta ótken olardyń alǵashqy aıqastary teń aıaqtalǵan bolatyn.

Sondaı-aq, búgingi baspasóz máslıhatynda Beıbit Shúmenov uzaq úzilisten keıin úlken sportqa qaıta oralǵanyn, Astanada 7 jasqa deıingi balalarǵa arnalǵan boks mektebin ashýǵa nıetti ekenin málimdedi.