Beıbit kúnde erligimen tanylǵan soltústikqazaqstandyqtar marapattaldy

PETROPAVL. QazAqparat – Petropavlda Qazaqstan Respýblıkasynyń Táýelsizdik kúnine oraı Soltústik Qazaqstan oblystyq tótenshe jaǵdaılar departamenti saltanatty jıyn ótkizdi.

Jıynda úzdik qyzmetkerler jáne erlik kórsetken birqatar óńir turǵyndary marapattaldy, dep habarlaıdy QazAqparat tilshisi.

SQO Tótenshe jaǵdaılar departamenti baspasóz qyzmetiniń málimetinshe, QR Táýelsizdik kúnimen departament garnızonynyń jeke quramyn vedomstvo basshysy Ramıl Kamalov quttyqtady. Soltústikqazaqstandyq órt sóndirýshiler men qutqarýshylardyń jumysyn joǵary baǵalap, alǵysyn bildirdi. Jalpy jyl basynan beri departament mamandary 2200 ret apattyq-qutqarý jumystaryna jáne órt sóndirýge shyqqan. Nátıjesinde 200-den astam adam qutqarylyp, 1800-deı adam qaýipsiz jerge shyǵaryldy. Qutqarý qyzmeti zardap shekken 48 adamǵa alǵashqy medıtsınalyq kómek kórsetken.

Óz isin asqan jaýapkershilikpen atqarǵan bir top qyzmetker QR Іshki ister mınıstrliginiń, QR ІІM Tótenshe jaǵdaılar boıynsha Komıtettiń jáne departamenttiń Qurmet gramotalarymen, Alǵys hattarymen marapattaldy.

Saltanatty jıyn barysynda Mamlıýt aýdany, Voskresenovka eldi mekeniniń turǵyny Vladımır Vorobevke de qurmet kórsetildi. Eki balanyń ómirine arasha túsken oǵan «Sýǵa batqandy qutqarǵany úshin» medali, al onyń jubaıy Tatıanaǵa QR ІІM TJK tóraǵasynyń atynan Alǵys hat tapsyryldy. Erli zaıypty 4 qarasha kúni sýǵa batyp bara jatqan balalardy qutqaryp, aman-esen áke-sheshesine tabystaǵan edi.

Sonymen qatar, bul kúni qarasha aıynda Esil aýdany Aqtas aýylynda órtke oranǵan úıden 5 gaz ballonyn alyp shyqqan QR Ulttyq ulan áskerı ınstıtýty oqý vzvodynyń komandıri Maǵjan Qalyqov ta marapattaldy. Áskerı ınstıtýt bastyǵynyń orynbasary Saverdın Imırov Maǵjan Qýanyshulynyń keýdesine «Ulttyq Ulan úzdigi» tósbelgisin taqty.

SQO Tótenshe jaǵdaılar departamentiniń bastyǵy Ramıl Kamalov ofıtserge Alǵys hatty tabys etti.