Beıbit Atamqulov Jambyl oblysyndaǵy jańa óndiristiń múmkindikterin aıtty

NUR-SULTAN. QazAqparat – Parlament Májilisiniń jalpy otyrysynda «QR Úkimeti men RF Úkimeti arasyndaǵy «Mıneraldyq tyńaıtqyshtar shyǵarý zaýytyn salý jáne paıdalaný» jobasyn iske asyrý týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Osy Kelisim 2019 jylǵy 3 sáýirdegi QR Indýstrııa jáne ınfraqurylymdyq damý mınıstrligi men RF Ónerkásip jáne saýda mınıstrligi arasyndaǵy óndiristik kooperatsııa salasyndaǵy birlesken is-qımyl baǵdarlamasyn iske asyrý aıasynda ázirlendi jáne qol qoıyldy.

«Kelisim Jambyl oblysynda fosfat shıkizatty óndirýden bastap eksportqa baǵdarlanǵan ónim - mıneraldyq tyńaıtqyshtar men ilespe ındýstrııalyq ónimder shyǵarýǵa deıingi tolyq óndiristik tsıkli bar ınnovatsııalyq hımııalyq keshenniń qurylysy men paıdalanylýyn qamtamasyz etetin qajetti ınvestıtsııalyq jáne normatıvtik-quqyqtyq jaǵdaılar jasaýdy kózdeıdi. Jobany EuroShem Group transulttyq kompanııasynyń enshiles kásiporny - Reseıdiń «EvroHım» kompanııasy iske asyrady. Jobany iske asyrý eki kezeńde júzege asyrylady», - dedi QR Indýstrııa jáne ınfraqurylymdyq damý mınıstri Beıbit Atamqulov.

Birinshi kezeń aıaqtaldy. Taý-ken kesheni paıdalanýǵa berildi. Onyń bazasynda:

- jylyna 660 myń tonnaǵa deıin fosforıt óndirý jolǵa qoıyldy;

- qýaty jylyna 640 myń tonna ortasha usaqtaý jáne usaq untaqtaý toraby salyndy;

- ınvestıtsııa somasy 126 mln AQSh dollaryn qurady;

Qazirgi tańda 550 jańa jumys orny ashyldy.

«Ekinshi kezeń óndiris qýaty jylyna keminde 1 mln tonna bolatyn mıneraldy tyńaıtqyshtar men ındýstrııalyq ónimder óndirý jónindegi ınnovatsııalyq hımııalyq keshen salýdy qamtıdy.

Qazirgi ýaqytta Qazaqstandaǵy Eýrohım kompanııalar toby II kezeńdi ozyq qarjylandyrý aıasynda 138,7 mln AQSh dollaryn ınvestıtsııalady», - dedi mınıstr.

Onyń aıtýynsha, kelisim korporatıvtik tabys salyǵynan, qosylǵan qun salyǵynan, múlik jáne jer salyǵynan bosatýdy qarastyrady.

Mınıstr jobany iske asyrý mynadaı nátıjelerge qol jetkizýge múmkindik beretinin aıtty:

- 1 mlrd AQSh dollarynan kem emes tikeleı sheteldik ınvestıtsııalar tartý;

- jańa jumys oryndaryn qurý, onyń ishinde qurylys kezinde - eki myńǵa deıin jańa jumys oryndaryn, paıdalaný kezinde keminde 1 200 jańa jumys ornyn qurý;

- eldiń jalpy ishki ónimin bes jyl ishinde shamamen 2,2 mlrd AQSh dollaryna arttyrý;

- eksport jáne eksporttyq túsim kólemin ulǵaıtý;

- memlekettik bıýdjetke salyq túsimderin 200 mlrd teńgege ulǵaıtý;

- ınnovatsııalyq qaldyqsyz tehnologııa boıynsha qýaty bar mıneraldyq tyńaıtqyshtar men ındýstrııalyq ónimder óndirýdi uıymdastyrý;

- Jańatas jáne Qarataý monoqalalarynyń jedel damýyna yqpal etý;

- mıneraldy tyńaıtqyshtardyń ımportyn almastyrýdy qamtamasyz etý.