Beıbit Atamqulov Temirtaýda atmosferaǵa kóp mólsherde lastaýshy zat shyǵarylǵan konverter tsehyna bardy

TEІRTAÝ. QazAqparat - QR Indýstrııa jáne ınfraqurylymdyq damý mınıstri Beıbit Atamqulov Temirtaý qalasyndaǵy metallýrgııa kombınatynda «ArselorMıttal Temirtaý» AQ basshylyǵymen kóshpeli kezdesý ótkizdi, dep habarlaıdy QazAqparat vedomstvonyń baspasóz qyzmetine silteme jasap.

Mınıstrge eń aldymen konverter tsehyna bardy. Onda jaqynda №2 konverterde úrleý kezinde alǵashqy gaz tazalaý press-skrýbberiniń qabyrǵalaryna jabysyp qalǵan shań opyrylyp qulaǵan. Sodan keıin peshte balqytý toqtatyldy.

Bebit Atamqulov jaǵda bolǵan jerde kásiporynnyń tehnıkalyq mamandarynyń oqıǵanyń yqtımal sebepteri týraly málimetin tyńdady.

Mınıstr, sondaı-aq, koks-hımııalyq óndiriste, domna peshinde, ystyqtaı myryshtaý jáne alıýmınııleý tsehynda boldy.

Kásiporyn basshylyǵynyń nazaryn dereý arada jańǵyrtý men ınvestıtsııany qajet etetin koks batareıalarynyń jaı-kúıine aýdardy.

Bul tseh tehnologııalyq protsestiń shıkizat quramalaryn, sondaı-aq bolat óndirisiniń barlyq negizgi tehnıkalyq bólinisterinde qoldanylatyn koks gazyn jetkizedi.

«ArselorMıttal Temirtaý» AQ Bas dırektory koks batareıalaryndaǵy jóndeý jumystarynyń barysy týraly baıandady. 2021 jyly № 3 jáne 4 koks batareıalaryn jóndeýdi tolyǵymen aıaqtaý josparlanyp otyr.

Sonymen qatar, Bıdjý Naır aldaǵy ýaqytta jylý elektr ortalyǵynda bý-aýa stansasyn, 2-shi jylý-elektr ortalyǵynda, kómir departamentiniń shahtalaryn jańǵyrtý jáne kómir metanyn qaıta óńdeý jobalaryn iske asyrý týraly aıtyp berdi.

Kásiporyn aldyna jańa ekologııalyq kodeks talaptaryna sáıkes zaýytty aýqymdy jańǵyrtý jáne tehnologııalyq jańartýǵa baǵyttalatyn ınvestıtsııany arttyrý mindeti qoıyldy.

Qazaqstanda qurylys kólemi aıtarlyqtaı qarqynmen ósip kele jatqandyqtan, mınıstr kombınat basshylyǵynyń nazaryn eń aldymen ishki naryqty metall prokatymen qamtamasyz etý qajettiligine aýdardy.

Eske sala ketsek, 19 aqpanda saǵat 16: 30-da «ArselorMıttal Temirtaý» kompanııasynyń úrleý kezinde gazdy tazartatyn alǵashqy skrýbberdiń qabyrǵalaryna jabysqan shań N 2 konverterge qulaǵan. Tseh jumysy dereý toqtatyldy. Qaraǵandy oblysy boıynsha ekologııa departamentiniń atmosferaǵa lastaýshy zattar shyǵaryndylarynyń ruqsat etilgen normalarynan asyp ketý faktisin tirkegen. Osyǵan baılanysty QR Ekologııa, geologııa jáne tabıǵı resýrstar mınıstrligi «ArselorMıttal Temirtaý» AQ-ǵa qatysty jospardan tys tekserý júrgizedi.