Beıbit Atamqulov sońǵy jyldardaǵy Elbasynyń sheteldegi kelissózderi týraly aıtty
«Astananyń messedji aıqyn - ol «bloktyq oılaýdan» arylý jáne álemdik kún tártibiniń túıindi máseleleri boıynsha bátýaǵa qol jetkizý úshin jetekshi derjavalardyń arasynda ınklıýzıvtik dıalogtyń qajettigi. Qazaqstannyń Qaýipsizdik Keńesindegi jumysy kezindegi jetistikterdiń kóbine-kóp Memleket basshysynyń syrtqy saıasattaǵy belsendi qyzmetiniń jáne onyń prıntsıptik beıbitsúıgish bastamalarynyń arqasynda múmkin bolǵanyna esh kúmán joq. Tek 2017-2018 jyldar ishinde ǵana Prezıdenttiń jıyrma tórt sheteldik, onyń ishinde Qaýipsizdik Keńesiniń turaqty músheleriniń astanalaryna saparlary ótip, eń ózekti máseleler boıynsha álemdik lıderlermen kóptegen kelissózderi ótkizildi. Joǵary deńgeıdegi kezdesýlerdiń qorytyndylary boıynsha Elbasy qol jetkizgen ýaǵdalastyqtar bizdiń dıplomattarymyzdyń kún saıynǵy qajyrly jumysy úshin negiz bolyp qalandy», - dedi mınıstr BUU Qaýipsizdik Keńesindegi Qazaqstannyń qyzmetine arnalǵan Úkimet saǵatynda.
Osy oraıda B. Atamqulov elimizdiń Birikken Ulttar Uıymynyń Qaýipsizdik Keńesindegi jumysyna toqtaldy.
«2018 jylǵy 18 qańtarda Elbasynyń tóraǵalyǵymen ótkizilgen «Jappaı qyryp-joıý qarýyn taratpaý: senim sharalary» taqyrybyndaǵy joǵary deńgeıli brıfıng bizdiń Qaýipsizdik Keńesindegi jumysymyzdyń sharyqtaýy bolǵany sózsiz. QR Prezıdenti Birikken Ulttar Uıymynyń Qaýipsizdik Keńesinde alǵash ret tóraǵalyq etti jáne Keńestiń resmı otyrystary zalynda memlekettik tilde sóz sóıledi. Qazaqstannyń tájirıbesi negizinde Nursultan Nazarbaev óz sózin ıadrolyq qarýdy taratpaý rejimin nyǵaıtýda senimniń erekshe róline arnaýǵa sheshim qabyldap, sol arqyly ıadrolyq qarýdan azat álemniń strategııalyq maqsatynyń qoljetimdiligin atap kórsetti. Qazaqstan basshysy tóraǵalyq etken otyrys ózara túsinistik atmosferasynda ótken jáne Koreı túbegindegi jaǵdaıdy qosa alǵanda, osy zamanǵy ózekti syn-tegeýrinderdi sapalyq jaǵynan jańa turǵyda qaraýǵa múmkindik bergen Qaýipsizdik Keńesiniń azdaǵan is-sharalarynyń biri boldy. Bul Prezıdenttiń saıası kóregendigin jáne onyń aıryqsha bitimgershilik áleýetin taǵy bir ret aıqyndady», - dedi Beıbit Atamqulov.
Budan buran habarlanǵandaı, Syrtqy ister mınıstri Qazaqstan BUU aıasynda óz mıssııasyn abyroımen oryndaǵanyn málim etti.