Beıbit Atamqulov farmatsevtıka ósimine ne sebep bolǵanyn atady

NUR-SULTAN. QazAqparat – 2021 jyldyń 2 aıynda farmatsevtıka ónerkásibinde óndiris kólemi 9,2 paıyzǵa artty. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Farmatsevtıka ónerkásibinde óndiris kólemi 9,2 paıyzǵa artty. Shyǵarylatyn ónim kólemi «Hımfarm» aktsıonerlik qoǵamynda 3 ese jáne «Nobel Almaty farmatsevtıkalyq fabrıkasynda» 27 paıyzǵa ulǵaıdy. Saladaǵy ósim negizinen halyqtyń dárilik zattar men medıtsınalyq buıymdarǵa degen suranysynyń artýy esebinen boldy», - dedi 2021 jyldyń qańtar-aqpanynda eldiń áleýmettik-ekonomıkalyq damýy jaıynda baıandaǵan mınıstr.

Onyń dereginshe, jeńil ónerkásipte óndiris 3,5 paıyz ósti. Oǵan kıimniń jáne bylǵary ónimderdiń ulǵaıýy áser etti.

«Dezınfektsııalyq quraldar men mıneraldyq tyńaıtqyshtarǵa suranystyń artýy hımııa ónerkásibiniń óndiris kólemin arttyrdy. Ósim 14,1 paıyz qurady. Qurylys materıaldary óndirisi 122,9 paıyz boldy. Oǵan portland-tsement, gıps óndirisiniń artýy esebinen qol jetkizildi», - dedi mınıstr.