Beıbit Atamqulov EQYU-nyń tóraǵasymen kezdesti
M. Laıchak EQYU tóraǵasynyń Ortalyq Azııa elderine dástúrli issapary aıasynda Qazaqstanǵa keldi.
«Búgin áriptesimmen EQYU kún tártibindegi ózekti máselelerdi talqyladyq. Qazaqstan men Uıym arasyndaǵy yntymaqtastyqtyń jaı-kúıi men keleshegi, aldaǵy josparlarǵa basa mán berildi. Kelissózderdiń basty taqyryby QR Tuńǵysh Prezıdenti - Elbasynyń EQYU sheńberinde Eýrazııalyq keńistiktegi keshendi qaýipsizdikti qamtamasyz etýge baǵyttalǵan bastamalary boldy», - dedi Beıbit Atamqulov QR Syrtqy ister mınıstrliginde ótken brıfıngte.
Atap aıtqanda, 2020 jyly Helsınkı Qorytyndy aktisiniń 45 jyldyǵyna arnalǵan Qaýipsizdik jáne yntymaqtastyq jónindegi halyqaralyq konferentsııany uıymdastyrý jáne EQYU, AÓSShK jáne ASEAN hatshylyqtary arqyly yntymaqtastyq qatynastaryn ornatýdy talqylady.
«Búgin biz EQYU barlyq jaýapkershilik aımaǵy boıynsha uıym qurylymdaryn birkelki ornalastyrýdy, uıym qyzmetiniń tıimdiligin arttyrý úshin dalalyq mıssııalardy jańa formatqa kóshirý múmkindigin talqyladyq. Osyndaı bolashaq formattardyń biri retinde, uıymnyń ekonomıkalyq jáne ekologııalyq ólshemderiniń maqsattary men mindetterin júzege asyratyn EQYU turaqty ózara baılanysy jónindegi taqyryptyq ortalyq qurý bastamasy qaralýda», - dedi Beıbit Atamqulov.
Sonymen qatar, mınıstrdiń aıtýynsha, Qazaqstan men Slovakııa yntymaqtastyǵynyń ózekti máseleleri talqylandy.
«Ótken jyly eki el arasyndaǵy dıplomatııalyq qarym-qatynastardyń 25 jyldyǵyn atap óttik. Bul mańyzdy jylda Qazaqstanǵa Slovakııanyń Premer-mınıstri Pıter Pellegrını alǵashqy resmı saparmen keldi, saýda-ekonomıkalyq yntymaqtastyq jáne saıası konsýltatsııalar boıynsha úkimetaralyq komıssııa otyrysy ótti. Jalpy kelissózder qorytyndysy boıynsha, biz barlyq deńgeıdegi dıalogty kúsheıtýge jáne yntymaqtastyqty tereńdetýge baǵyttalǵan kúsh-jigerdi jalǵastyrýǵa ýaǵdalastyq», - dedi Beıbit Atamqulov.