Beıbit Atamqulov «Azııa Avto» AQ tóńiregindegi máseleni túsindirdi
«2010 jyly maýsymda «Azııa Avto» AQ ónerkásiptik avtokólik qurastyrý týraly kelisimge qol qoıdy. Bul kelisim boıynsha 7 jylda - 2017 jyldyń 1 maýsymynda olar mindetti túrde ınvestıtsııa salyp, tehnologııalyq dánekerleý jáne kólik shanaǵyn boıaý óndirisin ashady degen shart boldy. 2017 jyly bul mindettemeler oryndalmady. Odan bólek, 2012 jylǵy jeltoqsanda «Azııa Avto Qazaqstan» AQ-men 2019 jyldyń 1 jeltoqsanynan bastap dál osy mindettemelerdi oryndaý týraly kelisimge qol qoıyldy. «Azııa Avto» jáne «Azııa Avto Qazaqstan» AQ óz mindettemelerin oryndaýǵa daıyn emestigin eskere otyryp, 2017 jyldyń basynda olar mınıstrlikke júginip, 2019 jyldyń 1 jeltoqsanyna deıin ónerkásiptik qurastyrý týraly kópjaqty kelisim jasasýdy surady. Osylaısha, mınıstrlik bul kásiporynǵa birneshe ret qaraılasyp keldi», - dedi mınıstr Úkimette ótken baspasóz máslıhatynda.
Mınıstrdiń aıtýynsha, bıyl 1 sáýirde «Azııa Avto» jáne «Azııa Avto Qazaqstan» usynǵan esepten keıin olardyń dánekerleý men kólik shanaǵyn boıaý mindettemelerin oryndamaǵany anyqtaldy.
«11 sáýirde mınıstrlik bul kásiporyndarǵa kemshilikterdi joıý týraly eskertý jiberdi. Bir aı ishinde eskertýdi oryndamasa, bul kelisimsharttardyń buzylýyna jáne basymdyqtardyń toqtatylýyna negiz bola alady. Bul kelisimde ónerkásiptik qurastyrý týraly kelisimniń sharttaryn oryndaýdan basqa jol joq. Sonymen birge, kelisimniń buzylýynan keıbir BAQ pen áleýmettik jelilerde habarlanǵandaı, kásiporyn jumysy toqtamaıdy. Kásiporyndar óz mindettemelerin oryndaǵannan keıin mınıstrlik kelisim jasaý men basymdyqtar berý múmkindigin qarastyrýǵa daıyn», - dedi B. Atamqulov.