Beıbit Atamqulov avtobýs jolaqtary týraly: Erejeni ákimdikter bekitýi kerek

NUR-SULTAN. QazAqparat – Halyq aldyndaǵy eseptik kezdesýin BAQ ókilderimen birge talqylaǵan Indýstrııa jáne ınfraqurylymdyq damý mınıstri Beıbit Atamqulov qoǵamdyq kólik jolaqtaryndaǵy shekteýlerdi azaıtý bastamasy týraly pikir bildirdi, dep habarlaıdy QazAqparat tilshisi.

«Mundaı bastamanyń negizi bar, árıne. Jolda keptelis bolmaý úshin avtobýs jolaqtarymen basqa kólikterdiń júrýine ruqsat berilmekshi. Biz kólik saıasatyna jáne avtobýs parkterin damytýǵa jaýapty mınıstrlik retinde mynany aıtqymyz keledi. Eger Іshki ister mınıstrligi osyndaı túzetý engizse, jergilikti ákimdikter ózi jaýapty qalada, oblys ortalyǵynda ýrbanıstıka men joldardyń damýyn esepteı otyryp, ereje bekitýi kerek. ıAǵnı, qaı baǵyt pen qaı ýchaskede kólikter avtobýs jolaǵyna túse alatynyn, qaı baǵyt pen ýchaskede túse almaıtynyn naqty bekitýi qajet. Eger bul sheshim avtobýs pen jolaýshylardyń qozǵalysyna kedergi keltirmeıtin bolsa, qoldaımyz. Al bekitilgen erejeler avtobýstardyń qalypty qozǵalysyna kedergi keltirip jatsa, aralasýymyzǵa týra keledi», - dedi mınıstr.

Beıbit Atamqulov Іshki ister mınıstrligi daıyndaǵan túzetýdiń saldary qandaı bolatynyn, dál qazir boldaý múmkin emes degen oı aıtty.

«Dál qazir avtobýs jolaqtaryna basqa kólikterdi jiberý qanshalyqty keptelis týǵyzatynyn baǵalaý múmkin emes. Ony sol jerdegi jergilikti organdar ǵana kóre alady. Sondyqtan da erejeni solar bekitýi kerek. Іshki ister mınıstrligi túzetý engizgen kúnniń ózinde ol jalpy ereje bolady. Al ár qaladaǵy jaǵdaı jergilikti ákimdikterdiń erejesimen rettelýi kerek. Bizge qaladaǵy qoǵamdyq kólikterdiń saǵat sııaqty minsiz jumys istegeni kerek. Biz qyzmetin retteıtin kásiporyndar shyǵyn da shekpeı, úzdiksiz qyzmet kórsetýi kerek. Biz osyǵan kóńil bólemiz», - dedi vedomstvo basshysy.