Beslan oqıǵasy: 1,5 myń adam qandy oqıǵa qurbandaryn eske aldy

ASTANA. QazAqparat - Soltústik Osetııanyń Beslan qalasyndaǵy №1 mektepte bolǵan lańkestik áreket qurbandaryn 1,5 myńnan astam adam qurmetpen eske aldy. Bul jaıly juma kúni TASS agenttigine quqyq qorǵaý qyzmetiniń qyzmetkerleri málim etti.

«1,5 myńnan astam adam mektepke keldi, kelip jatqan adamdar legi azaıdy, biraq olar áli de kelip jatyr. Bul kúni 150 adam «Perishteler qalasy» memorıaldyq keshenine keldi», - dedi agenttikke suhbat berýshi.

Qaraly shara qıraǵan mektepte jergilikti ýaqytpen saǵat 09:15 kezinde  mektep aýlasynda bastaldy.

Kelýshiler gúl shoqtaryn ákelip, sport zalyndaǵy qaza tapqandardyń fotosýretteriniń aldyna shamdar jaqty. Mektep aýlasyna lańkesterdiń úsh kún boıy tutqyndardy sport zalynda ustap turǵan kezinde ishýine tyıym salǵan sý jáne oıynshyqtar ákelindi. Qaraly shara únsizdikpen ótip, sońy jylaý-joqtaýǵa ulasty.

2004 jylǵy Beslannyń №1 mektebin  lańkesterdiń basyp alýy saldarynan 1,2 myń adam tutqynǵa alynǵan bolatyn. Sol kezde jáne odan keıin de jaraqat saldarynan 334 adam qaza tapty, olardyń 186-sy balalar. Tutqynǵa alynǵandardyń 126-sy múgedek bolyp qaldy, olardyń 70-i balalar. Zardap shekkenderdiń kóbi áli kúnge deıin saýyqtyrýdy qajet etedi.