«Besinshi Parlament úsh partııadan jasaqtalady» - respýblıkalyq basylymdarǵa sholý

ASTANA. 17 qańtar. QazAqparat - Qazaq aqparat agenttigi respýblıkalyq basylymdarda 17 qańtar, seısenbi kúni shyqqan ózekti materıaldarǵa sholýdy usynady.

***

«Egemen Qazaqstan» basylymynyń jazýynsha, 15 qańtarda Qazaqstan Respýblıkasy Parlamenti Májilisi depýtattarynyń kezekten tys saılaýy ótti. Keshe Ortalyq saılaý komıssııasy partııalyq tizimder boıynsha saılanatyn Parlament Májilisi depýtattary saılaýynyń aldyn ala qorytyndylaryn jarııalady.Oblystyq, Astana jáne Almaty qalalyq saılaý komıssııalarynan alynǵan aldyn ala málimetterge sáıkes, «Nur Otan» halyqtyq-demo­kratııalyq partııasy saı­laýshylardyń 80,74 paıyz daýsyn aldy. Saılaýdyń aldyn ala qorytyndylaryna qatysty ózge de málimetterdi «Aldyn ala qorytyndylaryn jarııa etti» degen maqaladan bilesizder.

 Sondaı-aq atalmysh basylymnyń jazýynsha, elimizde ótken Parlament Májilisi men máslıhattar saılaýynda «Nur Otan»  HDP jeńiske jetýine oraı Qazaqstannyń jas­tar uıymdary men birlestikteri de quttyqtaýlaryn jetkizýdi jón sanapty. «Qazaqstan jastar Kon­gre­si» men «Qazaqstan stýdent­ter Alıansy», «Jas ulan» biryńǵaı balalar men jas­ós­pirimder uıy­mynyń tóraǵalary Shahmardan Baımanov, Shyńǵys Beskempirov jáne Názıra Ból­tirikova elimiz­diń qoǵamdyq ómi­rindegi eń ma­ńyz­dy sharalardyń birine jas­tar­dyń bir kisideı atsalysyp, óz qalaýlaryn bil­dirý­ge belsendi qatysqandyǵyn jetkizdi. El jastarynyń «Nur Otan» partııasy men onyń saıasatyna qatysty kózqarastary jóninde «Egemen Qazaqstan» basylymynyń búgingi sanyndaǵy «Jastar jeńimpaz partııany quttyqtady» atty maqalada.

***

«Alash aınasy» basylymynyń jazýynsha, Astananyń azýly «arlandary» senbi kúni boks súıer qaýymdy taǵy bir serpiltip tastady. «Los-Anjeles matadorstyń» «buqalanyp» kelgen boksshylaryn birinen soń biri múıizin qaıyryp, kelgen eline qaıta attandyryp jiberdi. Nesin aıtasyz, aıyzymyz qanǵan boks boldy. Keńirdek jyrtylǵansha, bolysyp aıqaılaǵan jankúıerlerimizdiń bokstan alǵan áseri birazǵa deıin tarqamasy anyq. Atalmysh spor básekesiniń nemen aıaqtalǵandyǵyn «Alash aınasy» basylymynyń búgingi sanyndaǵy "Matadorlar" "Arlandarymyzdan" ońaı taıaq jedi" atty maqaladan oqyńyzdar.

Osy basylymnyń jazýynsha, Májilisti quraıtyn partııalar belgili. Paıyzdyq enshige qaraǵanda, Parlamenttiń tómengi palatasyndaǵy mártebeli 98 mandattyń 84-i «Nur Otanǵa», 7 oryn - Aq jolǵa, 7 oryn - kommýnısterge tıetin sekildi. Endeshe meje syzyǵyn eńsergen úsh partııa zań shyǵarýshy organda qyzmet etetin ózderiniń ókilderin úkileýge kirisse de bolady. Al konstıtýtsııalyq zańnamaǵa saı kóppartııaly bolyp qalyptasatyn besinshi shaqyrylym Parlamentiniń kóteretin júgi jeńil emes. Onyń eń bastysy - bolýy múmkin dep boljanatyn daǵdarysqa saýatty toıtarys berý! Bul týraly «Alash aınasy» basylymynyń búgingi sanyndaǵy «Besinshi Parlament úsh partııadan jasaqtalady» atty maqalada.

***

  «Qazaqstandyqtar «Nur Otan» partııasyna daýys berý arqyly oǵan taǵy kart-blansh berdi, ıaǵnı taǵy bir múmkindik jasady. Elimizdiń azamattary elimizdegi turaqtylyq pen birlik úshin, Prezıdent osyǵan deıin usynǵan baǵdarlamalardy iske asyrylýy úshin daýys berdi. Al bul degenińiz, Údemeli ındýstrııalyq-ınnovatsııalyq baǵdarlama, jumyspen qamtý men eldi mekenderdi aýyz sýmen qamtamasyz etý, turǵyn úı - kommýnaldyq sharýashylyǵyn jańǵyrtý, agrarlyq sektordy qolǵa alyp, kásipkerlikti damytý. Osy jáne ózge de bastamalardyń barlyǵy qazaqstandyqtar jumyspen qamtylyp, olardyń ál-aýqaty jyldan-jylǵa jetile bersin degen maqsattan týǵan dúnıeler»,-dedi Elbasy Májiliske Qazaqstan halqy Assambleıasy atynan saılanatyn depýtattardyń saılaýynda. Elbasy sonymen qatar ózi qolǵa alǵan isterdi júzege asyrý barysynda ylǵı da Assambleıaǵa arqa súıeıtinin atap kórsetti. Sondyqtan Assambleıa bolashaqta halyqpen tyǵyz baılanysta jumys isteýi kerek. Bul týraly «Kazahstanskaıa pravda» basylymynyń búgingi sanyndaǵy «Izbrany Assambleeı» atty maqaladan oqısyzdar.