«Besik jyry» anımatsııalyq fılmi taǵy bir halyqaralyq júldege ıe boldy

ASTANA. QazAqparat – Mádenıet jáne sport mınıstrliginiń qoldaýymen jaryqqa shyqqan «Besik jyry» qysqametrajdy anımatsııalyq fılmi Úndistanda ótken Roshani International film festival 2023 festıvalinde «Úzdik anımatsııalyq fılm» ataǵyn jeńip aldy, dep habarlaıdy QazAqparat.

Aýrangabad qalasynda tórtinshi márte ótken halyqaralyq festıval álemniń túkpir-túkpirinen talantty kınematografısterdi jınady. Bıyl baıqaýǵa 1300-ge jýyq jumys usynyldy. Onyń ishinde 132-i anımatsııalyq fılmder. Dala animation shyǵarmashylyq ujymy daıyndaǵan «Besik jyry» mýltfılmi qazylardyń eń joǵary baǵasyn alyp, kórermenniń kóńilinen shyqty.

Týyndy 2021 jyly Mádenıet jáne sport mınıstrligine qarasty Ulttyq kınony qoldaý memlekettik ortalyǵynyń qoldaýymen jasaldy.

«Aıta ketý kerek, bul «Besik jyry» anımatsııalyq fılminiń alǵashqy júldesi emes. Qazaqstandyq mýltfılm mamyr aıynda Ispanııa astanasy Madrıdte ótken bedeldi kınofestıvalde «Eń úzdik qysqametrajdy anımatsııalyq fılm» júldesin jeńip alǵan edi. Ol baıqaýǵa 1500 anımatsııalyq jumys úmitker retinde usynylǵanyn aıta ketken jón»,- dedi QR MSM Mádenıet komıtetiniń tóraǵasy Arman Júdebaev.

Eske salaıyq, «Besik jyry» qysqametrajdy anımatsııalyq fılminiń Madrıdtegi júldesi jóninde buǵan deıin jazǵan bolatynbyz.