Besik jasaýynan ulttyq naqyshty kórgim keldi – atyraýlyq sheber

ATYRAÝ. QazAqparat – Atyraýlyq sheber besik jasaýyn ulttyq naqyshpen tigedi. «Ár tigisti júrgizgende, bóbekke qýanysh syılaǵanyn ishteı tilep otyramyn» degen QazAqparat tilshisine Gúlzııa Isembaeva tiginshilikke bet burý sebebimen bólisti.

G.Isembaevanyń aıtýynsha, buryn onyń áýletinde tiginshilikpen aınalysatyndar bolmaǵan. Al ózi birneshe jyl buryn qurylys ındýstrııasynda ınjener-ekolog bolyp jumys istegen.

«Tiginshilikti qolǵa alǵanymda, bul qadamyma tańdanyspen qaraǵandar kóp boldy. Sebebi, buryn mundaı iske bet burý oıymda bolǵan joq edi. Tuńǵysh qyzym boıjetken soń materıaldyq, qarjylyq ıgilikter bala qýanyshyn almastyra almaıtynyn uǵyndyq. Sol kezde bala súısek degen oıǵa bekindik. Osyny sezgen bolýy kerek, qyzym besik terbetip otyrǵan ananyń sýretin syılady. Tipti, aǵaıyn-týys, dos-jaran balalaryna kindik sheshe bolýymdy ótindik. Eshqaısysyna qarsy bolmadym. Qolqa salǵandardyń bóbegine qajetti dúnıelerdi izdegende, ulttyq naqyshtaǵy túrleri tabylmaǵanyna qynjyldym. Osy olqylyqtyń ornyn toltyrý úshin qolyma is tigetin mashınka alyp, besik jasaýyn tigýdi bastadym», - deıdi Gúlzııa Isembaeva.

Bul úshin burynǵy jumysynan bas tartqan. Sóıtip, ózi dızaınerlikti de, tiginshilikti de meńgergen.

Onyń sheber qolynan shyqqan besik jasaýyn tapsyryspen aldyratyndar kóbeıgen. Tapsyrys berýshiler besik jasaýyn AQSh-ta ómirge kelgen nemeresine, Ońtústik Koreıada ósip jatqan jıenderine jibergen. Reseı Federatsııasynyń Astrahan, Orynbor oblystaryndaǵy qandastardan da tapsyrys túsken.

«Besiktiń ár jasaýyn bar yntammen tigýge tyrysamyn. Óıtkeni, besik jasaýy kishkentaı sábı úshin jaıly, ata-anasyna, sol otbasyndaǵy adamdarǵa unaıtyndaı ádemi bolýy kerek. Ulttyq naqyshtaǵy oıýdy salý úshin arnaıy qurylǵyny paıdalanamyn. Osy isti qolǵa alǵanda, besik jasaýynan ulttyq naqyshty kórgim keldi», - deıdi jergilikti sheber.

Tiginshiniń aıtýyna qaraǵanda, sábı súıýdi ańsaǵan juptar besik jasaýyn satyp alady eken. Keıin súıinshi surap, qýanyshymen bóliskenderi bar.

«Qazaq – yrymshyl halyq. Besik jasaýyn yrymdap alǵandar da sábı súıgenin qalaımyn. Sol sebepten, bul kásipti tabys kózi emes, adamdar qýanysh, baqyt syılaýdyń joly dep esepteımin», - deıdi Gúlzııa Isembaeva.

Eske salaıyq, buǵan deıin asaý úıretip, at ústinen sadaq atatyn atyraýlyq oqýshy qyz týraly jazǵan edik.