Besik arbanyń ishinen 1,5 kelige jýyq gashısh shyqty

ASTANA. 2 qazan. QazAqparat - Búgingi tańda qazaqstandyq shekarashylar Aýǵanstan men Irannan keletin, onyń ishinde Kavkaz aýmaǵyndaǵy elderdiń shekarasy arqyly Ujymdyq qaýipsizdik uıymyna qatysýshy elderdiń, Kedendik odaq memleketteriniń aımaǵyna ótetin esirtki arnalarynyń jolyn kesýge arnalǵan «Kanal - Kavkaz» dep atalatyn esirtkige qarsy is-sharasyna belsendilikpen qatysýda. Bul týraly QR UQK ShQ baspasóz qyzmeti habarlaıdy.

Sonyń nátıjesinde, taıaýda «Merke temirjol» shekaralyq baqylaý otrıadyna qarasty «Merke» baqylaý-ótkizý beketiniń shekarashylary «Bishkek - Ekaterınbýrg» baǵytyndaǵy jolaýshylar poıyzyn arnaıy ıttiń kómegimen tekserý kezinde balalarǵa arnalǵan besik arbanyń ishinen polıetılendi paketke oralǵan ózindik ıisi bar qaraqoshqyl zatty tapty. Zertteı kelgende onyń 1 keli 385 gr. bolatyn gashısh ekendigi anyqtaldy.

Osy is boıynsha 1960 jyly týǵan Qyrǵyzstan azamaty ustaldy. Saraptama ótkizilip, QR QK 250-babyna sáıkes qylmystyq is qozǵalatyn bolady.