Bes jyldan beri apat jaǵdaıynda turǵan Úıdene sý qoımasy qaıta jańarady

ÓSKEMEN. QazAqparat – Shyǵys Qazaqstan oblysy Zaısan aýdanynda 5 jyldan beri apattyq jaǵdaıda turǵan Úıdene sý qoımasy qaıta jańartylady, dep habarlaıdy QazAqparat tilshisi.

Bul týraly ShQO ákimi Ermek Kósherbaevtyń Zaısan aýdanyna jasaǵan jumys sapary barysynda belgili boldy.

Aımaq basshysy jergilikti turǵyndarmen kezdesip, saýaldaryna jaýap berdi.

«Aýdan halqy ózderin tolǵandarǵan suraqtaryn qoıyp, birqatar mańyzdy máseleni alǵa tartty. Mysaly, Zaısan áýejaıynan reıster sanyn ulǵaıtýǵa, Almaty men Astana baǵyttaryn qosýǵa tilek bildirdi. Sondaı-aq aýyl turǵyndaryn paıdalanylmaıtyn jaıylymdyq jerlerdi qaıtarý, aýdandy gazdandyrýdy jalǵastyrý jáne sapaly ınternetpen qamtamasyz etý túıtkilderi tolǵandyrady. Barlyq másele boıynsha beıindi basqarmalarǵa tapsyrmalar beriledi», - deıdi ákim.

Onyń aıtýynsha, Zaısan oqýshylary UBT tapsyrý úshin áli kúnge deıin Óskemenge barýǵa májbúr. Bul shamamen 500 shaqyrymdyq jol.

«Jaýapty emtıhan aldynda balalarymyz úshin qolaıly jaǵdaı jasaýymyz qajet. Zaısan qala mártebesine ıe bolǵandyqtan, mektep oqýshylaryna UBT-ny aýdanda tapsyrý múmkindigin qarastyrý kerek», - deıdi Ermek Kósherbaev.

Sapar barysynda ol kúrdeli jóndeýdi qajet etetin Úıdene sý qoımasyna bardy.

Búginde munda tek erigen qar sýy jınalady. Al bul jerdi sýarý úshin jetkiliksiz.

«Qazir sý qoımasyna qatysty 2016 jyly jasalǵan jobalyq-smetalyq qujattamaǵa túzetýler engizilýde. Sodan keıin respýblıkalyq bıýdjetten jóndeýge qarajat bólinedi», - deıdi oblys basshysy.