Bes jylda qarjy pıramıdalarynyń ústinen 600-den astam qylmystyq is qozǵalǵan

NUR-SULTAN. QazAqparat – QR Bas prokýrory Ǵızat Nurdáýletovtiń aıtýynsha, keıingi 5 jylda qarjy pıramıdalarynyń ústinen 600-den astam qylmystyq is qozǵalǵan, dep habarlaıdy QazAqparat tilshisi.

«Quqyq qorǵaý organdary qarjy alaıaqtyǵyna qatysy bar faktilerdi anyqtaý jáne jolyn kesý boıynsha turaqty jumys júrgizip otyr.

Sońǵy 5 jylda Qylmystyq kodekstiń 217-baby (qarjy pıramıdasyn qurý jáne oǵan basshylyq etý) boıynsha sotqa deıingi tergep-tekserýdiń biryńǵaı tiziliminde 618 materıal tirkelgen.

2019 jylmen salystyrǵanda byltyr osy sanat boıynsha tirkelgen qylmystar sany 7 ese ósti. Bul qarjy pıramıdalarynyń qyzmetin toqtatý boıynsha jumystardyń jandanǵanyn kórsetedi», - dep jazdy Ǵızat Nurdáýletov Májilis ókilderiniń depýtattyq saýalyna bergen jaýabynda.

Onyń málimeti boıynsha, bıylǵy 9 aıda qylmystyq qýdalaý organdarynyń óndirisinde qarjy pıramıdalary boıynsha 380 qylmystyq is qaralǵan.

Onyń ishinde 212 is sotqa joldansa, 2 is negizdemeniń joqtyǵynan qysqartylǵan.