Bes myńǵa jýyq mańǵystaýlyq onkologııalyq aýrýmen esepte tur

AQTAÝ. QazAqparat – Mańǵystaý oblystyq onkologııa ortalyǵynda 4 912 naýqas esepte tur. Bul týraly ortalyqtyń baspasóz qyzmeti málim etti, dep habarlaıdy QazAqparat tilshisi.

«Búgingi tańda ortalyqta 4 912 patsıent esepte tur. Onyń ishinde asqazan patologııasymen - 182 naýqas, uıqy bezi onkologııasymen-oblystyń 55 turǵyny, qýyq asty bezi obyrymen - 76 er adam, ókpe onkopatologııasymen - 187 adam tirkelgen» delingen baspasóz málimetinde.

Ortalyq mamandary onkologııalyq aýrý belgilerin erte anyqtaý maqsatynda 17 qarashada ashyq esik kúnin uıymdastyrmaq.

Shara ókpe qaterli isiginiń aldyn alý aılyǵy aıasynda ótkiziledi.

Onda mamandar ókpeniń tómen dozaly kompıýterlik tomografııasyn qoldana otyryp, tegin dıagnostıka júrgizedi.

Turǵyndardy qabyldaý 17 qarashada saǵat 9:00-14:00 aralyǵynda Aqtaý qalasynyń 1 «A» – shaǵynaýdanyndaǵy Mańǵystaý oblystyq onkologııa ortalyǵynyń ǵımaratynda ótedi.