Bes memlekettiń basshylary Kaspıı sammıtine qatysady
22:09, 23 Shilde 2018
ASTANA. QazAqparat - 2018 jyly 12 tamyzda Aqtaý qalasynda Besinshi Kaspıı sammıti ótedi, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Oǵan Kaspıı jaǵalaýy memleketteriniń Qazaqstan Respýblıkasy, Ázerbaıjan Respýblıkasy, Iran Islam Respýblıkasy, Reseı Federatsııasy jáne Túrikmenstannyń basshylary qatysady.
Sammıt barysynda taraptar Kaspıı teńiziniń quqyqtyq mártebesin, ekonomıka, kólik, qorshaǵan orta, qaýipsizdik salalary boıynsha Kaspııdegi yntymaqtastyqty jáne basqa da máselelerdi talqylaıdy.
Sammıttiń negizgi qorytyndy qujaty Kaspıı teńiziniń quqyqtyq mártebesi týraly konventsııa bolýy tıis. Onyń jobasy Máskeýde 2017 jyly 4-5 jeltoqsanda Syrtqy ister mınıstrleriniń jınalysy aıasynda kelisilgen edi.
Sammıt barysynda Konventsııadan basqa birqatar bes jaqty úkimetaralyq qujattarǵa qol qoıylýy múmkin.