Bes aıda 23 myńnan astam jambyldyq jumyspen qamtý sharalarymen qamtyldy

TARAZ. QazAqparat – Jambyl oblys ákimdiginde ótken kezekti apparattyq keńeste halyqty jumyspen qamtý máseleler saralandy, dep habarlaıdy QazAqparat tilshisi.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekov «Eńbek» baǵdarlamasy boıynsha bıyl 14,9 mıllıard teńge bólingenin habarlady.

31 mamyrdaǵy jaǵdaıǵa súıenetin bolsaq, oblys boıynsha jumyspen qamtýdyń belsendi sharalarymen 23 098 adam qamtylyp, jospar 57,5 paıyzǵa oryndalǵan.

Barlyǵy 345 jambyldyq 1404,3 mıllıon teńge kóleminde shaǵyn nesıe alsa, 2 810 jambyldyq 1 639,4 mıllıon teńge kóleminde grantqa ıe bolǵan.

«Qaıtarymsyz granttar boıynsha oblystyq kórsetkish 74,3 paıyzdy quraǵanymen, Baızaq jáne Merki aýdandarynda bul kórsetkish 35,7 paıyz jáne 50 paıyz dengeıinde, ıaǵnı oblystyq deńgeıden tómen satyda qalyptasqan» , - dedi J.Baýbekov.

Áleýmettik jumys oryndaryna 1 226 adam jiberilse, onyń ishinde 138-i turaqty jumysqa ornalasqan.

746 túlek jastar tájirıbesi boıynsha joldama alsa, onyń ishinde 61-i turaqty jumysqa turǵan.

«Bizdiń basty mindetimiz – turǵyndardyń turaqty jumyspen qamtylýyna kómektesý. Al ol úshin bólingen qarajatty, birinshi kezekte, granttar men shaǵyn nesıeler boıynsha ýaqytyly jáne tolyq kólemde ıgerý qajet. Bes aı ótti, biz áli de jumysty júıelendire almaı otyrmyz. Aýdan men oblys ortalyǵynyń ákimderine jospardy oryndaý boıynsha tıisti sharalar qabyldaýdy tapsyramyn. Biz óz isin jańa bastaǵan kásipkerlerge birden birneshe adamdy jumysqa alýyna qol ushyn berýimiz kerek», - dedi oblys ákimi.

Berdibek Saparbaev kásipkerlik jáne ındýstrııalyq-ınnovatsııalyq damý basqarmasyna qatysty birqatar eskertýler aıtty.

«Turǵyndar memlekettik qoldaý sharalarynan, olar boıynsha qaıda júginý kerektiginen habarsyz, sondyqtan aqsha ýaqytyly ıgerilmeıdi. Halyqpen keri baılanys ornatatyn ýaqyt jetti», - dedi ol.

Berdibek Saparbaev eger suranysqa ıe mamandardy oqytsaq, jumyssyzdyq deńgeıi tómendeıtindigin alǵa tartty.

«Biz jumyssyzdyqty qoldan jasamaýymyz kerek. Bilim granttaryn taratpas buryn, suranysqa ıe mamandyqtyń tizimin jasańyzdar. Qazir oblysta birneshe jańa zaýyt salynyp jatyr, qoldanystaǵy zaýyttar keńeıtilýde. Olarǵa qandaı mamandar qajet ekenin anyqtaý kerek», - dep tapsyrdy oblys ákimi bilim basqarmasyna.

Sondaı-aq, aımaq basshysy memlekettik organdar qarjy ınstıtýttarymen tyǵyz baılanysta jumys jasaı almaı otyrǵandyǵyn tilge tıek etti.