Bes áleýmettik bastama: jataqhanalar oqý ornyna jaqyn mańda salynady
«Jataqhana máselesin kún saıyn baqylaýda ustap otyrmyz. Memlekettik tapsyryspen jáne aqyly negizde oqıtyn stýdentter bar, sheteldik JOO-lardan aýysyp kelgender bar. Sáıkesinshe, qajettilik te artyp keledi. Qazirgi ýaqytta respýblıka boıynsha 89 386 oryn qajet (JOO-da - 64 436 oryn, kolledjde - 24 950 oryn). Ásirese, Almaty men Astana, Shymkent qalalarynda oryn tapshylyǵy qatty sezilip otyr. Bul máseleni sheshý úshin birqatar jumys atqaryldy. Eń aldymen, qarjylandyrý turǵysynda úsh jylǵa arnalǵan respýblıkalyq bıýdjet Parlamentte qaralyp jatyr. Memlekettik bilim berý tapsyrysy boıynsha jataqhana oryndarymen qamtý shyǵyny 15 mlrd teńgeni qurady. Osylaısha, 2019-2021 jyldary 45 myń jańa oryn ashý josparlanyp otyr», - dedi Bıbigúl Asylova «Nur Otan» partııasy ortalyq apparatynda ótken jastardy qoldaý týraly komıssııa otyrysynda.
Ekinshiden, 2019-2020 jyldary júzege asyrý josparlanǵan jobalardyń bárine jer ýchaskesi berilgen.
«Qurylys retinde belgilengen 156 jer ýchaskesiniń 105-i qazirdiń ózinde bilim uıymdaryna tıesili. Ózderińiz biletindeı, JOO, kolledjderdiń aýmaǵy keń jáne olar óz aýmaǵynda jataqhana turǵyza alady. Qalǵan 51 jer ýchaskesi ákimdikten bólindi. Ákimdikterden oqý ornyna jaqyn mańnan jer telimin bólýdi suraǵan edik. Sol úshin jergilikti atqarýshy organdarǵa alǵys aıtqym keledi. Úshinshiden, qazirgi ýaqytta 33 jer teliminiń jobalyq-smetalyq qujattamasy daıyn. 43 jer ýchaskesiniń qujattamasy ázirlenip jatyr. Jyl sońyna deıin bul protsedýra tolyq aıaqtalady», - dedi B. Asylova.
Sonymen birge, jataqhanalardy paıdalanýǵa berýge qajetti normatıvtik bazanyń barlyǵy qabyldandy.
«Biz óz túzetýlerimizdi tanystyrǵanda depýtattar ári qaraı osy protsesti retteıtin tıisti normatıvtik-quqyqtyq aktiler qajet ekenin aıtty. 18 qyrkúıekte barlyq zańnamalyq aktiler Ádilet mınıstrliginde memlekettik tirkeýden ótti. Bul aktiler bıyl 2 qazanda kúshine enedi», - dep sózin túıindedi vıtse-mınıstr.
Eske sala ketsek, 2018 jyldyń 5 naýryzynda Memleket basshysy Nursultan Nazarbaev «Prezıdenttiń bes áleýmettik bastamasy» atty halyqqa úndeýin jarııalady. Úndeýdiń úshinshi bastamasy joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartýǵa arnalǵan. Atap aıtqanda, Elbasy jyl saıyn bólinetin 54 myń grantqa qosymsha 20 myń grant bólip, 2022 jyldyń sońyna deıin stýdentterge arnap keminde 75 myń oryndyq jataqhana salýdy tapsyrdy.