Bes áleýmettik bastama óńirde turǵyn úı qurylysyn jandandyrady-M.Myrzalın
Sharaǵa depýtattyq korpýs ókilderi, oblystyq basqarmalar men departamentter, quqyq qorǵaý organdarynyń basshylary, qoǵamdyq ujymdar, ulttyq kompanııa tóraǵalary, saıası partııalar men BAQ ókilderi qatysty.
«Ózderińizge belgili, dál keshe naýryzdyń 5-de Qazaqstan Respýblıkasynyń Prezıdenti Nursultan Ábishuly Nazarbaev Parlamenttiń birlesken otyrysynda Qazaqstan halqyna úndeýin jarııalady. Atalǵan úndeýinde Elbasy «Qazaqstan - bizdiń ortaq úıimiz» degen aýqymdy áleýmettik jobany júzege asyrýǵa bastama jasady. Osy jobanyń aıasynda áleýmettik naqty máselerdi sheshýge baǵyttalǵan 5 negizgi basymdyqtar anyqtaldy. Búgingi oblys aktıvine osy Úndeýdiń negizgi baǵyttaryn talqylaý úshin jınalyp otyrmyz», deı kele aımaq basshysy bes áleýmettik bastamadaǵy negizgi mindetterge toqtaldy.
«Birinshi basymdyq baspana alýǵa jańa múmkindikter týǵyzyp otyr. Baspananyń turǵyndarǵa qoljetimdi bolýy úshin Elbasy «7-20-25» baǵdarlamasyn usynyp otyr. Jyldyq syıaqysy 7 paıyzdan aspaıtyn, alǵashqy jarnasy 20 paıyzdan aspaıtyn, tóleý merzimi 25 jylǵa deıin jetetin ıpotekalyq nesıe berý arqyly qazaqstandyqtardyń birazy baspana máselesin sheshe alady. Búgingi kúni Aqmola oblysynda 20 myńnan astam adam páter kezeginde tur. Oblysta «Nurly jer» baǵdarlamasy boıynsha 16 jaldamaly, 12 nesıelik turǵyn úıler salynýda. Bul ótken jylǵy kórsetkishpen salystyrǵanda 2,5 esege kóp. Sonymen qatar, 2400 jer teliminde jeke turǵyn úı qurylysyn júrgizý úshin ınjenerlik kommýnıkatsııalar tartylady. Jalpy, Memleket basshysynyń bes áleýmettik bastamasy óńirde turǵyn úı qurylysyn jandandyrady», dep atap ótti aımaq basshysy.
Sonymen qatar, ol óńirde 250 myńǵa jýyq adam aılyq eseptik kórsetkishten 25 ese tómen jalaqy alatynyna toqtaldy.
«Tómendetilgen tabys salyǵynan bosatylǵan 353 mıllıon teńge tómen aılyq alatyn adamdardyń eńbekaqysyn kóterýge baǵyttalatyn bolady», dedi oblys ákimi.
Al, úshinshi bastama boıynsha oblysta aýqymdy jumystar atqarylýda. Bilim salasynda jańa reformalar júrgizilýde. Sońǵy eki jylda 10 myń muǵalim jańa baǵdarlama boıynsha arnaıy kýrstardan ótti.
«2018 jyldan bastap osy kategorııadaǵy muǵalimderdiń aılyq aqysy 30 paıyzǵa ósti. Bilim salasyn damytý úshin, Memleket basshysynyń tapsyrmasymen qosymsha 20 myń grant bólinedi. Oǵan qosa, oblystyq bilim, qurylys, ekonomıka jáne bıýdjetti josparlaý basqarmalarynyń basshylaryna memlekettik jekemenshik seriktestik sheńberinde stýdentterge jataqhana salý joldaryn zerttep, qarastyrýdy tapsyramyn», -dedi oblys ákimi.
Sonymen qatar, jıynda Elbasynyń bes áleýmettik bastamasynyń tórtinshi jáne besinshi baǵyttary shaǵyn nesıe kólemin arttyrý jáne gazdandyrý máseleleri de sóz boldy. Bul jóninde «Regıon stroı» JShS-niń dırektory Aleksandr Dvortsevoı, oblystyq memlekettik kirister departamentiniń basshysy Táýken Oshaqbaev, oblystyq bilim basqarmasynyń basshysy Valerıı Gamazov, «Atameken» óńirlik kásipkerler palatasynyń dırektory Qaırat Sultanov jáne «Atabasar gaz» JShS-niń dırektory Rınat Muratovtyń pikirleri tyńdaldy.