Berlınde qazaqstandyq ákimshilik ádilet júıesiniń jetistikteri aıtyldy
Qazaqstan tarapynan QRJS ákimshilik ister jónindegi sot alqasynyń tóraǵasy Aslan Túkıev, Sot ákimshiliginiń basshysy Naıl Ahmetzakırov jáne halyqaralyq yntymaqtastyq bóliminiń meńgerýshisi Shákir Shaıahmetov qatysty. Aslan Túkıev Qazaqstanda 2021 jyldyń shildesinen beri jumys istep kele jatqan ákimshilik ádilettiń jetistikterimen bólisti.
Qazaqstandyq sottar 60 paıyzdan astam isterde memlekettik organdarmen daýlar boıynsha azamattar men kásipkerlerge qoldaý kórsetedi. Ulttyq sot júıesine degen senimniń artýy baıqalady, bul elimizdi ınvestıtsııa úshin barynsha tartymdy etedi. 350-den astam qazaqstandyq sýdıany qaıta daıarlaý baǵdarlamasyna Germanııa, Ázerbaıjan, Latvııa, Estonııa jáne basqa da elderdiń sýdıalarynyń qatysýy elimizdegi ákimshilik sottardyń qalyptasýynda mańyzdy ról atqardy. Bul baǵdarlama Germanııa halyqaralyq yntymaqtastyq qoǵamynyń (GIZ) qoldaýymen uıymdastyrylǵan.
Konferentsııa aıasynda Naıl Ahmetzakırov Vısmar qalasyndaǵy Shyǵys quqyǵy ınstıtýtynda qazaqstandyq sýdıalardy oqytýdy jalǵastyrý týraly kelisimge qol qoıdy. Bul Qazaqstannyń sot júıesin damytýdaǵy jáne onyń halyqaralyq quqyqtyq qoǵamdastyqqa ıntegratsııalanýyndaǵy jańa qadam bolmaq.