Berlınde Qazaqstan – Germanııa jumys tobynyń birinshi otyrysy ótti
Jıynǵa Germanııa ekonomıkasy Shyǵys komıteti prezıdıýmynyń múshesi jáne Ortalyq Azııa elderiniń basshysy, sondaı-aq GP Günter Papenburg AG baqylaý keńesiniń múshesi, professor Manfred Grýndke, «Báıterek» ulttyq basqarýshy holdıngi» Basqarma tóraǵasynyń orynbasary Ádil Muhamedjanov jáne qazaqstandyq kompanııalar men nemis bıznesiniń basqa da ókilderi qatysty.
Otyrys aıasynda «Qazaqstannyń Damý Banki» AQ Germanııanyń Landesbank Hessen-Thüringen (Helaba) bankimen 100 mıllıon eýroǵa deıingi somaǵa Qarjylyq yntymaqtastyq týraly kelisimge qol qoıdy. Bul Jumys tobynyń qyzmetine serpin berdi.
«Báıterek» UBH» AQ Basqarma tóraǵasynyń orynbasary Ádil Muhamedjanov jumys toby Qazaqstanda da, Germanııada da bıznestiń básekege qabilettiligin arttyrýdyń negizgi tetigi qyzmetin atqaratynyn atap ótti.
«Búginde bizde yntymaqtastyqty nyǵaıtýǵa jáne uzaqmerzimdi jáne ózara tıimdi iskerlik qarym-qatynas úshin negiz jasaýǵa biregeı múmkindik bar. Jumys toby tyǵyz saýda qatynastary men kommertsııalyq baılanystardy damytýǵa, sondaı-aq ózara saýda men ınvestıtsııany ilgeriletýge berik negiz beredi», - dedi Á.Muhamedjanov.
Qazirgi ýaqytta jumys toby Qazaqstannyń 30-dan astam birlesken ınvestıtsııalyq jobalaryn qarastyryp jatyr. Sonyń ishinde KAZAKH INVEST, Qazaqstannyń Damý banki, Agrarlyq nesıe korporatsııasy jáne «Astana» Halyqaralyq qarjy ortalyǵy jobalary bar.
Eske sala keteıik, bıyl 20 maýsymda GFR Federaldyq prezıdenti F-V. Shtaınmaıer Qazaqstanǵa memlekettik saparmen kelgen bolatyn. Sol kezde Astanada Qazaqstan – Germanııa saýda-ınvestıtsııalyq forýmy alańynda «Báıterek» UBH» AQ men Germanııa ekonomıkasy Shyǵys komıteti arasynda birlesken jobalardy qarjylandyrý boıynsha jumys tobyn qurý jónindegi memorandýmǵa qol qoıyldy.