Berlınde «Abaı úıi» ashyldy

BERLIN. QazAqparat - «Otandastar» qory QR Aqparat jáne qoǵamdyq damý, Syrtqy ister mınıstrlikteriniń qoldaýymen, sondaı-aq «Dúnıejúzi qazaqtary qaýymdastyǵy» HQU-men birlese otyryp, Germanııa astanasynda «Abaı úıi» qazaq mádenı-iskerlik úıiniń saltanatty ashylýyn ótkizdi, dep habarlaıdy QazAqparat tilshisi.

QR Aqparat jáne qoǵamdyq damý mınıstrliginen málim etkendeı, shara aıasynda «Abaı úıi» mádenı-iskerlik úıiniń tusaýkeseri ótip, onda Germanııadaǵy qazaq qoǵamdastyǵynyń mádenı, iskerlik jáne bilim berý qyzmetin qoldaýǵa baǵyttalǵan birlesken jobalardy iske asyrý máseleleri talqylandy.

Eske sala keteıik, buǵan deıin «Abaı úıi» mádenı-iskerlik úıleri Ombyda (Reseı), Tashkentte (Ózbekstan), Ystanbulda (Túrkııa) ashylǵan bolatyn. Sonymen birge «Otandastar qory» KEAQ shet memleketterde «Abaı úıi» mádenı-iskerlik úıleri jelisin ashýdy jalǵastyrýda.

Іs-sharaǵa QR Aqparat jáne qoǵamdyq damý mınıstrligi Etnosaralyq qatynastardy damytý komıteti tóraǵasynyń orynbasary Erkin Úısimbaev, QR Syrtqy ister mınıstrligi Konsýldyq qyzmet departamenti qazaq dıasporasymen jumys basqarmasynyń basshysy Muhtar Káribaı, Qazaqstannyń Germanııadaǵy Elshiliginiń mádenıet jónindegi attashesi Qýanysh Ámirǵazıev, «Otandastar» qory» KEAQ vıtse-prezıdenti Maǵaýııa Sarbasov, Germanııa-Qazaqstan qoǵamynyń dırektory Galına Nurtazınova, Qazaqstan Respýblıkasynyń Baden-Vıýrtembergtegi qurmetti konsýly Doroteıa Haller-Leıble, Germanııadaǵy qazaq qaýymynyń ókilderi jáne taǵy basqalary qatysty.