«Beriktik kórsetken Berikjan » - baspasózge sholý
***
Búgin - jalpyulttyq aza tutý kúni. Qandy jeksenbi, ıaǵnı, 5 maýsym kúni Aqtóbe oblysynda oryn alǵan terrorlyq áreketke baılanysty Memleket basshysy málimdeme jasap, lańkesterdiń qolynan qaza tapqandardy aza tutý kúnin belgiledi. «QazAqparat» halyqaralyq aqparat agenttigi de erlikpen qaza tapqan áskerılerdiń jáne beıbit turǵyndardyń jaqyndaryna qaıǵyryp kóńil aıtady.
***
«Egemen Qazaqstan» gazeti Aqtóbedegi №6555 áskerı bólimi atqyshtar batalony sapyndaǵy áskerı qyzmetshi Berikjan Qalıevtiń erligin taǵy bir atap kórsetken. Basylymnyń habarlaýynsha, Oral óńiriniń týmasy kishi serjantty keshe jaqyndary men týǵan-týysy sońǵy saparǵa shyǵaryp saldy. «Berikjan Qalıev terrorshylarmen tiresý kezinde atyna zaty saı berik jan ekenin tanyta bildi. Ol eliniń tynyshtyǵy úshin shybyn janyn pıda etti. Osyndaı batyr da batyl er tárbıeleı bilgen Berikjannyń ata-anasyna qaıǵyryp kóńil aıtamyz»,-degen batyrdy aqtyq saparǵa shyǵaryp salý rásimine qatysa otyryp, BQO ákimi Altaı Kólginov. Basylymnyń habarlaýynsha, marqum qyzmet etken áskerı bólimniń basshylyǵy Berikjan Qalıevti memlekettik nagradaǵa usynady. Bul týraly tolyǵyraq «Egemen Qazaqstan» gazetindegi «Beriktik kórsetken Berikjan» atty maqaladan oqı alasyzdar.
Basylym «Qylmyskerler qatań jazaǵa tartylýy tıis» degen taqyryppen Memleket basshysy Nursultan Nazarbaevtyń Ulttyq qaýipsizdik komıtetiniń tóraǵasy Vladımır Jumaqanovqa bergen tapsyrmasy jaıly jazady. Kezdesý barysynda V.Jumaqanov Memleket basshysyna Aqtóbe oblysyndaǵy antıterrorlyq operatsııanyń osy kezeńge deıingi nátıjeleri týraly baıandady.Ulttyq qaýipsizdik komıtetiniń tóraǵasy qazirgi ýaqytqa deıin 13 qylmyskerdiń kózi joıylyp, 14-i jaralanǵanyn aıtty. Budan bólek, daıyndyq kezeńinde qylmysqa qatysýdan 20 adam bas tartqan, olar anyqtalyp, jaýap alyndy. Qazirgi kezde 6 adam izdestirilýde, qolda bar aqparat boıynsha, olar Aqtóbe oblysynyń aýmaǵynda júr. Qazaqstan Prezıdenti Aqtóbe oblysyndaǵy terrorıstik áreketterge qatysy bar adamdardy ustap, tutqyndaý jumystaryn tıimdi túrde júrgizý qajettigin atap ótti.
- Biz olardyń sol óńirde ekenin bilemiz, jeke bastaryna qatysty málimetter belgili, halyqqa esker¬tildi. Qylmyskerlerdiń bárin túgel tutqyndaý qajet. Qarýly qarsylyq kórsetken jaǵdaıda kózderin joıý kerek. Barlyǵy eń qatal jazaǵa tartylýǵa tıis, - dedi Nursultan Nazarbaev. Bul týraly tolyǵyraq «Egemen Qazaqstan» gazetiniń búgingi sanynan oqı alasyzdar.
***
«Aıqyn» respýblıkalyq basylymynyń habarlaýynsha, Astana qalasynda Qazaqstan Respýblıkasy, Shanhaı yntymaqtastyq uıymy múshe memleketteri qorǵanys mınıstrleriniń kezekti keńesi ótti. Ótken jeksenbide Aqtóbede bolǵan terrorlyq áreketterdi alǵa tarta otyryp, halyqaralyq terrorızm men óńirlik ekstremızmniń órshý qaýip-qateri jaǵdaıynda qorǵanys vedomstvolarynyń basshylary Uıymnyń keńistiginde turaqtylyq pen qaýipsizdikti nyǵaıtýda úılestirilgen birlesken is-qımyldyń mańyzdylyǵyn erekshe atap ótken eken. «Keńeske QR Qorǵanys mınıstri Imanǵalı Tasmaǵambetov, Memlekettik keńes múshesi - QHR Qorǵanys mınıstri general-polkovnık Chan Vantsıýan, Qytaı Respýblıkasynyń qorǵanys isteri jónindegi Memlekettik komıtetiniń tóraǵasy general-maıor Marat Kenjısarıev, RF Qorǵanys mınıstri armııa generaly Sergeı Shoıgý, Tájikstan Respýblıkasynyń Qorǵanys mınıstri general-leıtenant Sheralı Mırzo, Qorǵanys mınıstriniń birinshi orynbasary - Ózbekstan Respýblıkasy Qorǵanys mınıstrligi Bas shtabynyń bastyǵy general-leıtenant Shavkat Normatov qatysty. «Kezdesý barysynda qorǵanys vedomstvolarynyń basshylary halyqaralyq jáne óńirlik qaýipsizdiktiń ózekti máseleleri boıynsha pikir almasyp, bul salada ShYU memleketteri arasyndaǵy ózara túsinistiktiń joǵary deńgeıin atap ótti» dep jazady basylym. Basa aıta keterligi, qorǵanys vedomstvolarynyń basshylary qaýipsizdikti qamtamasyz etý jáne ShYU múshe memleketteriniń janyndaǵy shekaralardan áskerı qaýip-qaterlerge qarsy is-qımyl, sondaı-aq jedel aqparat almasý boıynsha qorǵanys vedomstvolarynyń yntymaqtastyǵyn damytý máseleleri jóninde úılestiriletin, konsýltatıvtik tetikterdi jetildirýge ýaǵdalasqan. Bul týraly tolyǵyraq «Aıqyn» gazetiniń búgingi sanyndaǵy «Qorǵanys mınıstrleriniń keńesi ótti» degen maqaladan oqı alasyzdar.
***
«Ekspress K» gazeti atys-shabys pen jarylys týraly jalǵan aqparat taratýshylar jazady. Aqtóbedegi jaǵdaı ýshyǵyp turǵan kúnderi belgisiz bir er adam Batys Qazaqstan oblysynyń Іshki ister departamentine qońyraý shalyp, «bomba jarǵaly» jatqanyn habarlaıdy da tutqany qoıa salady. Quqyq qorǵaýshylar bul áreketke barǵan adamy lezde tapqan. El dúrligip jatqanda jumysy joq 37 jastaǵy azamat araq iship alyp, quqyq qorǵaýshylarmen osylaısha «ázildegisi» kelgen eken. Qazir oq ýaqytsha qamaý ızolıatoryna jabyldy. Bul týraly tolyǵyraq «Ekspress K» gazetindegi «Vremıa shýtok konchılos» atty maqaladan oqı alasyzdar.