Berik Ýálı Prezıdenttiń baspasóz hatshysy qyzmetinen bosatyldy

NUR-SULTAN. QazAqparat - Memleket basshysynyń ókimimen Berik Ýálı Qazaqstan Respýblıkasy Prezıdentiniń Baspasóz hatshysy laýazymynan bosatyldy. QazAqparat bul týraly Aqordaǵa silteme jasap habarlaıdy.

Eske salaıyq, buǵan deıin Berik Ýálı «Habar» agenttigi» AQ Basqarma tóraǵasy bolyp taǵaıyndalǵanyn jazǵan bolatynbyz.

Berik Ýálı 1997 jyly T.Júrgenov atyndaǵy Qazaq memlekettik teatr jáne kıno ınstıtýtyn «kınotanýshy», 2005 jyly ál-Farabı atyndaǵy Qazaq Ulttyq ýnıversıtetin «jýrnalıstıka», 2014 jyly Qazaq ınnovatsııalyq gýmanıtarlyq-zań ýnıversıtetin «quqyqtaný» mamandyqtary boıynsha bitirgen. 1997-2012 jyldary – «Habar» Agenttigi» AQ-nyń, «TAŃ» telekompanııasynyń, «NTK» telearnasynyń, «31 kanal» JShS-niń jýrnalısti, aqparattyq baǵdarlamalarynyń redaktory, «Nur Medıa» JShS-niń jemqorlyqqa qarsy medıa ortalyǵynyń jetekshisi. 2012-2015 jyldary – Ońtústik Qazaqstan oblysy ákimi apparaty basshysynyń orynbasary, baspasóz qyzmetiniń basshysy, ishki saıasat jáne din isteri basqarmasynyń basshysy. 2015-2016 jyldary – «Nur Otan» partııasy tóraǵasy Birinshi orynbasarynyń keńesshisi. 2016-2018 jyldary – Qazaqstan Respýblıkasy Investıtsııalar jáne damý mınıstriniń keńesshisi, Aqparattyq qamtamasyz etý departamentiniń dırektory. 2018-2019 jyldary – Jambyl oblysy ákimdiginiń Іshki saıasat basqarmasynyń basshysy. 2019 jyly naýryzda Memleket basshysynyń ókimimen Qazaqstan Respýblıkasy Prezıdentiniń Baspasóz hatshysy bolyp taǵaıyndaldy. «Daryn» memlekettik jastar syılyǵynyń ıegeri.