Berik Ýálı QR IDM-nyń qoǵammen baılanys bóliminiń meńgerýshisi bolyp taǵaıyndaldy

ASTANA. QazAqparat - Berik Ýálı QR Investıtsııalar jáne damý mınıstriniń keńesshisi jáne qoǵammen baılanys bóliminiń meńgerýshisi bolyp taǵaıyndaldy. Bul týraly mınıstr Jeńis Qasymbek Feısbýktegi paraqshasynda jarııa etti.

«Tanymal telejýrnalıst, qoǵam belsendisi Berik Ýálı QR Investıtsııalar jáne damý mınıstrligine jumysqa kelip jatyr. Berik Ýálı búginnen bastap mınıstrdiń keńesshisi ári qoǵammen baılanys bóliminiń meńgerýshisi bolyp taǵaıyndaldy», dep jazdy QR Investıtsııalar jáne damý mınıstri Jeńis Qasymbek.

Onyń aıtýynsha, mınıstrlikte Aqparattyq qamtamasyz etýmen aınalysatyn arnaıy departament qurylýda. Aldaǵy ýaqytta mınıstrlik osy departament arqyly qoǵammen baılanysty kúsheıtýdi kózdep otyr.

Berik Ýálı jýrnalıstıka salasynda jınaǵan tájirıbesin sońǵy jyldary memlekettik qyzmette de tıimdi ushtastyryp keledi. OQO ákimi apparaty basshysynyń orynbasary - baspasóz qyzmetiniń basshysy, OQO ishki saıasat jáne din isteri basqarmasynyń basshysy, «Nur Otan» partııasy Tóraǵasy Birinshi orynbasarynyń keńesshisi qyzmetterin abyroımen atqarǵan.

Jeńis Qasymbek Berik Ýálıdi jańa qyzmetimen quttyqtap, mınıstrliktiń jumysyn halyqqa jaqyndatýǵa baǵyttalǵan ıgi isterdiń bastamashysy bolatyndyǵyna senim bildirdi. 

Buǵan deıin QR IDM burynǵy resmı ókili Qaısar Jumabaıuly Feısbýktegi paraqshasynda «Búgin meniń de kásibı ómirimde aıtarlyqtaı ózgeris. Jumysymdy aýystyrýǵa bel býdym», dep jazdy. Al mınıstrliktiń Kadr jumysy departamentiniń dırektory Marat Iǵalıev Feısbýkte Qaısar Jumabaıulyna birlesip 7 jyl jumys isteskenine alǵys bildirdi.