Berik Imashev prezıdenttikke úmitkerlerdi usyný merzimine qatysty pikir bildirdi

NUR-SULTAN. QazAqparat - QR Ortalyq saılaý komıssııasynyń tóraǵasy Berik Imashev «Saılaý týraly» QR Zańynyń prezıdenttikke kandıdattardy usyný merzimine qatysty normasynyń qate túsindirilýine qatysty pikir bildirdi, dep habarlaıdy QazAqparat tilshisi.

Konstıtýtsııalyq zańda «Prezıdenttikke kandıdattardy usyný saılaý jarııa etilgen kúnnen keıingi kúnnen bastalyp, saılaýǵa eki aı qalǵanda jergilikti ýaqyt boıynsha saǵat 18-00-de aıaqtalatyny» atap ótilgen.

«Shynymen de, baspasóz betterinen baıqap qaldyq. Bul arandatýshylyq pa nemese zańdy jete bilmeý me - túsine almaı otyrmyn. Zańnyń kezekti saılaýǵa qatysty babyna pikir bildirilgen. Sol úshin búgin arnaıy aıtyp otyrmyn - kezekten tys saılaý bolǵan kezde kúntizbelik merzimdi Ortalyq saılaý komıssııasy bekitedi», - dedi Berik Imashev OSK otyrysynan keıingi baspasóz máslıhatynda.

Buǵan deıin QR Ortalyq saılaý komıssııasy tóraǵasynyń orynbasary Konstantın Petrov aǵymdaǵy jyldyń 9 maýsymynda ótetin kezekten tys prezıdent saılaýyna kandıdattardy usyný 28 sáýirde aıaqtalatynyn málim etken bolatyn.