Berik Ábdiǵalıuly: Eregispen enshi alý qazaqtyń qanynda joq qasıet
«Qordaıdaǵy jaǵdaı, qoǵamdaǵy túrli talqyǵa túsken taǵdyrlar eshkimdi beı-jaı qaldyrmaǵany anyq. Birneshe adam shyǵyny boldy. Qaza bar jerde jaza da bolary anyq. Ony quzyrly oryndar tergep, teksere jatar. Meniń aıtpaǵym memleket quraýshy ult – qazaq halqynyń qaqy jaıynda. Iá memleket quraýshy ult qazaq halqy ekenine eshkimniń daýy joq. Biraq biz memleket quraýshy ult retinde biriktirýshi ultqa aınala aldyq pa degen saýal meni jıi mazalaıdy», - dep jazady Berik Ábdiǵalıuly facebook paraqshasynda .
Ulytaý aýdanynyń ákimi osy turǵydan alǵanda ulttyq qundylyqtarymyzdy qurmetteýdi, salt-dástúrimizge saı ómir súrip, dinimiz ben tilimizdi berik ustanýda, ókinishke qaraı, eshkimge úlgi bola almaı otyrǵanymyzdy jazady.
«Qazaq «Ózińdi – óziń jattaı kút, jat boıynan túńilsin» deıdi. Ózge ult ókilderi qazaq halqyn qurmettesin desek, birinshi kezekte ózimizdi ózimiz syılap, basqaǵa syılata bilýimiz kerek. Eregispen júrip enshi alý bizdiń qanymyzda joq qasıet. Eldiń bereke-birlikte kún keship, qoǵamdyq-saıası ahýaldyń turaqty bolýyna memleket quraýshy ult retinde birinshi kezekte qazaq halqy jaýapty. Al ózge ult ókilderi dástúrimizdi dáriptep, tilimiz ben dinimizdi syılap, zańymyzdy qurmettep, memlekettik tildi meńgerip, jattyǵyn sezdirmese, bizdiń de olarǵa qashanda qushaǵymyz ashyq. Táýelsiz elimizde, óz jerimizde birligimizben qazaqtyń tóńireginde birikken bir el bolyp, ónegemizben ózgeni baýyrymyzǵa basa bileıik», - deıdi ol.