Berik Ábdiǵalı: Tarıhı eskertkishterdi qorǵaý zańyna «Qasıetti oryndar» pýnktin qosqan durys

ASTANA. QazAqparat - QR Tarıhı-mádenı mura obektilerin qorǵaý jáne paıdalaný týraly zańǵa «qasıetti oryndar» pýnktin qosqan durys. Astanada «Qazaqstannyń kıeli jerleriniń geografııasy» jobasyn talqylaý boıynsha ótken «Mıras» respýblıkalyq keńesiniń kóshpeli otyrysynda «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalı osyndaı usynys tastady, dep habarlaıdy «QazAqparat» HAA tilshisi.

«Qazaqstannyń qasıetti jerleriniń tizimin biz beske bóldik. Eń aldymen, erekshe baǵalanatyn tabıǵı muralar eskertkishi. Olar eldiń burynnan beri baryp júrgen kıeli oryndary. Shyǵys Qazaqstandaǵy Qońyr Áýlıe úńgirin, Ońtústiktegi Aqmeshit, sondaı-aq Jylaǵan ata sekildi úńgirlerdi, Han Táńiri, Sharyn shatqaly, Muztaý sekildi kıeli jerlerimizdi osy qatarǵa jatqyzýǵa bolady», -deıdi ol.

Berik Ábdiǵalı, sonymen birge, arheologııalyq eskertkishter jáne orta ǵasyrdaǵy qalalar taǵy bir bólimge bólingenin aıtady. Onyń sózine sensek, qazirgi tańdaǵy úlken mindettiń biri - ejelgi dáýirden bastap qazirgi kúnge deıingi Qazaqstan tarıhyn qamtyp, jalpyulttyq jáne aımaqtyq tizimge barlyq eskertkishterdi engizý bolyp otyr.

«Biz Qazaqstannyń qasıetti jerlerin bekitkende ol jerlerdiń mártebesin aıqyndaý arqyly eskertkishterdi qorǵaý zańyna ózgeris engizýdi kózdep otyrmyz. Ózderińiz biletindeı, mádenı eskertkishterdi qorǵaý týraly zań bar. Sol zańǵa «Qasıetti oryndar» degen pýnkti qosý, osy arqyly ár orynnyń ǵylymı ári zańdy túrde anyqtamasyn berý josparlanýda. ıAǵnı, qasıetti oryndardyń memlekettik reestri bekitilse, QR Mádenıet jáne sport mınıstrligimen ár orynnyń qujaty jasalady. Ol qujatta qasıetti oryndardyń sýreti men tarıhy kórsetiledi. Osylaısha, Qazaqstandaǵy qasıetti oryndardyń statýsy zańdy túrde belgilenedi», - deıdi «Qasıetti Qazaqstan» ǵylymı-zertteý ortalyǵynyń jetekshisi.

Berik Ábdiǵalı sonymen qatar, bıyldyń ózinde «Qazaqstannyń qasıetti jerleriniń jalpyulttyq jáne aımaqtyq tizimi» degen kitap jaryqqa shyǵatynyn málim etti. Sonymen qatar, árbir nysannyń kartasy men vırtýaldy túsirilimi jasalǵan.

«Arnaıy rolıkter túsirilip, entsıklopedııa jazyla bastady. Baǵdarlama 5 jylǵa arnalǵannan keıin bıylǵy jyly tórt óńirdi, Astana qalasy men Aqmola oblysy, Almaty qalasy men Almaty oblysyn tańdap otyrmyz. Almatydaǵy ǵalymdar, Ǵarıfolla Ánes (Arys qory) óz eńbegin tapsyryp, osynyń báriniń sátin salsa qańtar aıynyń 20-na taıaý tusaýkeserin ótkizemiz», - deıdi Berik Ábdiǵalı.