Berik Ábdiǵalı: Qazaqstannyń kıeli oryndaryn halyq anyqtaıdy

ASTANA. QazAqparat - Ǵalymdar men ólketanýshylardan quralǵan «Qazaqstannyń kıeli jerleri» jobasynyń aýqymdy ekspedıtsııasy Qazaqstannyń túrli aımaǵyndaǵy turǵyndardan kıeli jerler týraly málimetter men oı-pikirler jınaqtaıdy. Bul týraly «Sakraldy Qazaqstan» ǵylymı-zertteý ortalyǵynyń dırektory Berik Ábdiǵalı jýrnalısterge bergen suhbatyna aıtty, dep habarlaıdy QazAqparat.

«Kıeli jer» mártebesin memleket bekitpeıdi. Muny halyqtyń ózi anyqtaıdy. Eger halyq bul oryndy kıeli dep sanasa, bizdiń buıryqtar men sheshimdersiz-aq kıeli bolyp sanalady. Halyq nege bul oryndy kıeli dep sanaıdy, ne úshin taǵzym etedi, mine osyny bilýimiz qajet. (...)  Biz ázirge derekter jınaýdy bastadyq. Ár óńirde mundaı oryndar sany ár túrli, biraq kartaǵa enetin kıeli oryndardyń naqty sanyn ekspedıtsııadan keıin ǵana aıta alamyz. Ekspedıtsııa bir aıdan keıin bastalady. Jaz sońyna qaraı, eki-úsh aıda, naqty tsıfrdy jarııalaı alamyz. Ekspedıtsııa quramynda ǵalymdar men jergilikti ólketanýshylar bolady», - dedi ol «Qazaqstannyń kıeli jerleriniń geografııasy» jobasyn júzege asyrý jónindegi jumys tobynyń birinshi respýblıkalyq forýmynda.

Aıta keteıik, jobanyń negizgi operatory bolyp QR Ulttyq mýzeıi bekitildi. Dál osy mýzeı bazasynda «Qasıetti Qazaqstan» ortalyǵy ashyldy. Óz kezeginde munda aldyńǵy qatarly ǵalymdardyń, arheologtardyń, tarıhshy-etnograftardyń jáne ólkentanýshylardyń qatysýymen sarapshylar toby quryldy.

«Jalpy bul joba bes jylǵa josparlanyp otyr. Kıeli oryndar tizimi jyl sońyna deıin anyqtalady. Biraq osy baǵdarlamaǵa sáıkes, bes jyl boıy kitaptar, albomdar shyǵarylyp, fılmder túsiriledi,  Qazaqstannyń kıeli oryndary tizimine engen nysandarda týrıstik baǵyttardy damytý jumystary qolǵa alynady», - dep atap ótti Berik Ábdiǵalı.

Onyń aıtýynsha, «Qasıetti Qazaqstan» - dinı joba emes, taza ǵylymı da joba emes. Bul Qazaqstan tarıhynda orny bar tulǵalardyń, jerlerdiń tizimin jasaý.  Bul tizimge tas dáýirinen qalǵan nysandar da enýi múmkin», - dep túsindirdi ǵalym.

Sonymen birge, QR Mádenıet jáne spot mınıstrliginiń baspasóz qyzmeti kıeli oryndardy irikteý tártipterin atap kórsetti.  Kıeli oryndar tizimine tabıǵı landshaft obektileri, arheologııalyq jáne arhıtektýralyq eskertkishter, erekshe ardaq tutatyn dinı nysandar jáne tarıhı tulǵalardyń jáne saıası oqıǵalarmen baılanysty kıeli oryndar enetin bolady.

Sondaı-aq, mınıstrlik Qazaqstannyń soltústik, shyǵys, batys, ońtústik jáne ońtústik-shyǵysyna - alty baǵyty boıynsha ǵylymı-zertteý jáne dala ekspedıtsııalaryn júrgizýdi josparlanǵanyn habarlady.