Berik Ábdiǵalı: Bul - tarıxı tulǵanyń tarıxı sheshimi

ASTANA. QazAqparat - Bul - tarıxı tulǵanyń tarıxı sheshimi. Belgili saıasattanýshy, tarıhshy ǵalym, «Qasıetti Qazaqstan» ǵylymı-zertteý ortalyǵynyń jetekshisi Berik Ábdiǵalı QR Tuńǵysh Prezıdenti - Elbasy Nursultan Nazarbaevtyń Qazaqstan Respýblıkasynyń Prezıdenti retindegi ókilettigin toqtatý jónindegi sheshimine qatysty osylaı pikir bildirdi, dep habarlaıdy QazAqparat.

Ǵalym Elbasy qıyn-qystaý ýaqyttan eldi aman alyp shyqqanyn atap ótti.

«Bul tarıxı tulǵanyń tarıxı sheshimi. Nursultan Nazarbaev óz málimdemesinde bılikte bolǵan 30 jylyna sholý jasap, memleket tarıhyndaǵy mańyzdy oqıǵalarǵa toqtalyp ótti. Shyn máninde Tuńǵysh Prezıdent óte qıyn, kúrdeli kezeńde el tizginin qolyna aldy. Keńestik Qazaqstannan Táýelsiz Qazaqstan qalyptastyrý jolynda úlken jaýapkershilikti moınyna júktedi. Qıyn-qystaý ýaqyttan eldi aman alyp shyqty», - dep jazdy Berik Ábdiǵalı áleýmettik jelidegi paraqshasynda.

Onyń aıtýynsha, táýelsizdik jyldarynda jańa urpaq ósip-jetilgen. Memlekettiń damý úrdisin jalǵastyratyn tulǵalar qalyptasqan.

«Osynyń bári memlekettik saıasatta sabaqtastyq júretinin kórsetedi. Úlken ózgeris bolady dep oılamaımyn. Nursultan Nazarbaevtyń Tuńǵysh Prezıdent degen mártebesi saqtalady. Nur Otan partııasynyń tóraǵasy qyzmetinde qala beredi. Sońǵy ózgeristerge baılanysty Qaýipsizdik keńesi tóraǵasynyń quzyreti keńeıdi.
Táýelsizdik jyldary Tuńǵysh Prezıdenttiń el qýatyn eseleýge qosqan eńbegi men úlesi sheksiz. Qazaq memleketi jańǵyrdy. Shekaramyz belgilenip, memlekettik rámizderimiz anyqtaldy. Táýelsizdik qundylyqtary qalyptasty. Qazaqstan álemge tanylyp, ǵalamdyq saıası protsesterge belsendi aralasa bastady. Osy 30 jyl qazaq tarıxynda «Nursultannyń Nurly joly» degen ataýmen qalady», - dep jazdy Berik Ábdiǵalı.

Eske sala ketsek, keshe Nursultan Nazarbaev respýblıkalyq telearnalar arqyly Qazaqstan halqyna arnalǵan málimdeme jasap, Qazaqstan Respýblıkasynyń Prezıdenti retindegi ókilettigin toqtatý jónindegi sheshimin jarııa etti.