Berezov aýyly turǵyndary túgeldeı kóshirildi - BQO
Bul úshin Araltal aýylynda 100 turǵyn úı jáne Aqsaı qalasynda eki 153 páterlik toǵyz qabatty úı salyndy. Elbasy tapsyrmasyna sáıkes oblys ákimi Altaı Kólginov atalmysh aýyldar turǵyndarymen birneshe ret kezdesip, kóshirý barysyn udaıy nazarda ustap otyrdy.
Úılerdi salǵan kezde berezovtyqtar men bestaýlyqtardyń talap-tilegi eskerildi. Araltaldaǵy úılerdiń teń jartysy 3 bólmeli (95 sharshy metr), qalǵany 4 bólmeli (105 sharshy metr). Gazdandyrylǵan úılerge taza jáne tehnıkalyq sý jetkizilgen, kireberis joldarǵa asfalt tóselgen. Aýlada baý-baqsha daqyldaryn egip, jemis aǵashtaryn otyrǵyzýǵa, qora-qopsy salýǵa bolady. Turǵyndarǵa qolaıly bolýy úshin jańa avtobýs baǵyty ashyldy. Bul úılerdiń bári «QPO b.v.» kompanııasynyń qarjysyna turǵyzyldy. Araltalda sondaı-aq 300 oryndyq mektep boı kóterdi, ol qańtar aıynda óz esigin aıqara ashatyn bolady.
Aqsaıda salynǵan kóp qabatty eki úıdiń árqaısysynda 36 bir jáne sonsha tórt bólmeli, 54 eki, 27 úsh bólmeli páterler bar. Qurylys kezinde páter alańy bir adamǵa 15 sharshy metrden kem bolmaýy eskerildi. Úılerde Aqsaıda birinshi ret avtonomdy qazandyqtar ornatylǵan. Balalar oıyn alańy qarastyrylǵan. Bul maqsatta Eýropada keńinen taralǵan jumsaq rezeńke jabyn qoldanylmaqshy. Aqsaıda oǵan qosa aýyl turǵyndarynyń balalary úshin 320 oryndyq balabaqsha paıdalanýǵa berildi.
Berezov jáne Bestaý aýyldarynyń turǵyndaryna jańa úılerden bólek 1 mıllıonnan 15 mıllıonǵa deıin materıaldyq ótemaqy tólendi.
Eske sala keteıik, Qarashyǵanaq kenishi sanıtarlyq qorǵaý aımaǵynyń keńeıtilýine baılanysty atalmysh aýyl turǵyndaryn kóshirý budan eki jyl buryn bastalyp, 82 otbasy Aqsaıǵa qonystanǵan bolatyn. Kóshirýdiń ekinshi kezeńi bıylǵy tamyzda bastaldy.