Bereke-birligi jarasqan Álimovter áýleti: 12 bala tárbıelep, ósirgen otbasy jaıly

ÓSKEMEN. QazAqparat – Otbasy – oshaqtyń jylýy. Bul sizdi árkez kútip, sheksiz jaqsy kóretin kıeli meken. Ár qyrkúıektiń ekinshi jeksenbisi elimizde Otbasy kúni atap ótiledi. Shyǵys Qazaqstan oblysynda turatyn Álimovter áýleti úshin bul merekeniń orny bólek. Seksenniń seńgirinen asqan Ómirbek aqsaqal men Rysgúl áje 12 bala ósirip, 28 nemere 18 shóbere súıip otyr. Balalarynyń barlyǵy joǵary bilimdi, eńbekqor, óz qyzmetterinde eleýli jetistikke jetip júrgen jandar. Rysgúl áje quraq qurap, tigin tikse, kenje qyzy Alýa da anasynyń jolyn qýyp ulttyq kıim tigýmen aınalysady. Búgingi bizdiń maqalamyz shattyq qonǵan osy shańyraq jaıly bolmaq.

Ómirbek Álimov 1941 jyldyń 22 maýsymynda Tarbaǵataı aýdany Jańalyq eldi mekeninde dúnıege kelgen. Ákesi Álim 1944 jyly súzek aýyrýynan qaıtys bolyp, apaılary Lázzat, Zamash úsheýlerin kıyn zamanda saýynshy bolyp istegen sheshesi «qanattyǵa qaqtyrmaı, tumsyqtyǵa shoqtyrmaı» asyrap ósirdi. Ómirbek shańyraqtaǵy er bala bolǵandyqtan fermanyń buzaýyn baǵyp, eńbekke erte aralasty.

«1957 jyly Abaı orta mektebinde 8-shi synypty bitirgen kezim. Anamyzdyń densaýlyǵy nasharlap ketip, orta mektepti aıaqtaýǵa jaǵdaı kelmedi. Oqýdy tastap, jumysqa kirisip kettim», - dep eske aldy aqsaqal.

Osylaısha, 16 jastaǵy bozbala otbasyn asyraý úshin túrli jumysta ter tókken. 1963 jyly shofer mamandyǵyn alyp, aýdandyq aýrýhanada jedel járdem kóliginiń júrgizýshisi bolyp ornalasqan. Al 1972 jyldan bastap Aqjar aýylyndaǵy №5 avtobýspen jolaýshy tasydy. Bul jumysta zeınetkerlikke deıin eńbek etti.

Qudaı qosqan alǵashqy qosaǵy Nurǵaısha ekeýi Álııa, Márzııa, Jańyl, Serik, Qanat, Ashat esimdi ul-qyzdardy dúnıege ákeldi. Nurǵaısha 1980 jyly ómirden ozdy.

«Ýaqyt bárine emshi. Qazirgi jarym Rysgúl de 25 jasynda 3 qyzyn qushaqtap joldasynan aıyrylǵan. Taǵdyrdyń jazýymen 1982 jyly ekeýimiz qosylyp, otbasyn qurdyq», - deıdi Ómirbek Álimov.

Ekeýi 9 balany bir úıdiń balasyndaı ósirip, tárbıeledi. Sońynan taǵy 3 perzentti dúnıege ákeldi. Rysgúl 1950 jyly Qytaı Halyq Respýblıkasyndaǵy Dúrbiljiń aýdanynda týǵan. Ol uzaq jyl Tarbaǵataı aýdandyq oqý bóliminde esepshi qyzmetin atqaryp, sol jerden zeınetke shyqty. «Kúmis alqa» ıegeri. Bos ýaqytynda quraq qurap, tigin tikkendi jaqsy kóredi. Kenje qyzdary Alýa anasynyń jolyn jalǵap, ulttyq kıim tigýmen aınalysady. Óziniń jeke býtıgin de ashqan.

Ómirbek aqsaqal men Rysgúl áje bul kúnde 12 baladan 28 nemere, 18 shóbereniń qyzyǵyn kórip otyr. Ortanshy qyzdary Jańyl syrqattanyp qalyp, dúnıeden ótken. Biraq 3 balasynan 6 nemere súıgizdi. Balalary túgeldeı joǵary bilimdi. Zarlyq esimdi ortanshy qyzdary bilim salasynyń úzdigi, «Janashyl ustaz» tósbelgisimen marapattalǵan. QR Altyn kitabyna da engen.

Kenje uldary Berik Alımov erkin kúresten álem chempıony. Qazir bapker bolyp, jastardy sportqa baýlyp júr. B.Saıhanov atyndaǵy balalar-jasóspirimder sport mektebinde jumys isteıdi. Byltyr Italııa astanasy Rımde 17 jasqa deıingi jasóspirimder arasynda 55 keli salmaqta óner kórsetip, álem chempıony atanǵan Daryn Áskerbek onyń shákirti. Sol úshin Berik Álimov elimizde «2022 jyldyń Úzdik jattyqtyrýshysy» atanǵan.

Al Aıajan esimdi qyzdary Shyǵys Qazaqstan oblysy boıynsha QAJ departamentiniń Óskemen qalalyq probatsııa qyzmetinde aǵa ınspektor bolyp eńbek etedi. Búginde ádilet kapıtany. Osy salada júrgenine 15 jyldan asqan. Ata-anasynan jaqsy tárbıe alyp, óz ómirin ishki ister organdaryna arnaǵan Aıajan búginde eki ul ósirip otyr.

«Men óz otbasymmen maqtanamyn. Birligimiz jarasyp, bir-birimizge demeý bolyp óstik. Ózim 10-shy balamyn. Qazir árqaısymyz ómirlik jolymyzdy taýyp, bólek shyqsaq ta únemi baılanystamyz. Aýyldaǵy qarashańyraqty saǵynyp, eńbek demalysynda qustaı ushyp jetemiz. Áke-sheshemiz bizge qandaı jaǵdaı bolmasyn eshkimniń ala jibin attamaýǵa, adamdarǵa qolymyzdan kelgenshe kómektesip júrýge úıretti. Sebebi jasaǵan jaqsylyǵyń da, jamandyǵyń da mindetti túrde ózińe qaıtyp keledi», - deıdi Aıajan Álimova.

Onyń aıtýynsha, ózindik ıgilikti dástúrlerdi berik ustanyp, bir-birin qadirleı bilý, aıtqanyna qulaq asý, úlkenge qurmet, kishige izet kórsetý – ár otbasyn baqytty etetin eń negizgi qasıetter.

«Osy kúnge jetkizgen Jaratqanǵa árdaıym shúkir deımiz. Qazir nemere-shóberelerime de aqyl aıtyp, durys jolǵa salýǵa tyrysamyn. Olardyń osyndaı tynysh zamanda ómir súrip jatqanyna qýanamyn. Bizdiń balalyq shaq surapyl soǵys endi aıaqtalǵan qıyn-qystaý ýaqytta ótti. Endi ondaıdy Qudaı basqa bermesin. Barsha qazaqstandyqtardy Otbasy kúnimen shyn júrekten quttyqtaımyn! Úılerińizde tek qýanysh, baqyt, mereke bolsyn. Elimiz órkendep, jastarymyz bıikterdi baǵyndyra bersin!», - deıdi Ómirbek aqsaqal.