Berdibek Saparbaev: ÚEU ókilderimen birige jumys jasaýǵa qashan da daıynbyz

NUR-SULTAN. QazAqparat – Úkimet basshysynyń orynbasary Berdibek Saparbaev Nur-Sultan qalasynyń úkimettik emes uıymdary ókilderimen kezdesti, dep habarlaıdy QazAqparat tilshisi.

Premer-Mınıstrdiń orynbasary ÚEU ókilderimen Qazaqstan Prezıdentiniń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» Joldaýy aıasynda mańyzdy máselelerdi talqylady. ÚEU ókilderimen birge EKSPO ǵımarattarynyń birinde ótken jıynda Aqparat jáne qoǵamdyq damý mınıstri Dáýren Abaev qatysty.

«Búgingi kezdesýdiń mańyzy zor. Sebebi, bárimiz de osy memlekettiń damýyna, bolashaǵyna jaýaptymyz. Kemshilikter bolsa oǵan da jaýap beretin – biz. Óıtkeni, bárimiz de qoǵamnyń múshesimiz. Úkimettiń maqsaty – úkimettik emes uıymdarmen, qoǵammen jumys isteý. Úkimettik emes uıymdar halyqty tolǵandyratyn máselelerdi biledi. Sony bizge jetkizip, máselelerdiń sheshilýi jolynda birige jumys isteýimiz kerek», - dedi Berdibek Saparbaev.

B.Saparbaev Úkimettiń árdaıym Úkimettik emes uıymdarmen birige jumys júrgizýge daıyn ekenin atap ótti.

«Osy ýaqytqa deıingi jumystardyń bárin bilesizder. Memleket tarapynan qandaı kómek pen qoldaýdyń kórsetilip jatqanyn habardarsyzdar. Máselen, osy otyrysta qoǵamdyq keńester týraly másele aıtylyp jatyr. Kelisemin – qoǵamdyq keńesterdiń jumysyn kúsheıtýimiz kerek. Qoǵamdyq keńes pen máslıhat bir bólek. Árqaısysynyń óziniń mindeti bar. Al endi olardy saılaý jóninde eshqandaı qarsylyq joq. Qoǵamdyq uıymdar arqyly atqarylyp jatqan sharýa elge jetýi kerek. Halyqtyń sheshilmeı jatqan máseleleri qoǵamdyq uıymdar arqyly aıtylyp, sheshimin tabýy tıis», - dedi Berdibek Saparbaev.