Berdibek Saparbaev týǵan jerge kelgen aqtóbelikterge alǵys aıtty
Aqtóbe oblysynyń ákimi Berdibek Saparbaev «Týǵan jer» forýmyna qatysýshylarǵa alǵysyn aıtty. Aqtóbelik jastar óz jerlesterin úlgi etetinin, ǵaryshker ıÝrıı Lonchakovty, Qorǵanys mınıstriniń orynbasary Murat Makeevti, áskerı qaıratker Bolat Janasaevty, qazaqtan shyqqan tuńǵysh dáriger Aqqaǵaz Dosjanovany, Ulttyq neırohırýrgııa ortalyǵynyń dırektory Serik Aqsholaqov pen Ulttyq tranplantologııa ortalyǵynyń dırektory Jaqsylyq Dosqalıevti, ǵalymdar Jasaral Eńsepov, Anar Jubanovny sekildi tulǵalardy úlgi tutatynyn jetkizdi.
«Árbir adam úshin týǵan jeri qymbat. Qazaqta «týǵan jerdeı jer bolmaıdy, týǵan eldeı el bolmaıdy» dep aıtady. Qazaq týǵan jerin, týǵan elin, týǵan tilin boıtumaıyndaı qasterlegen. Elbasy Nursultan Nazarbaev «Bolashaqqa baǵdar: rýhanı jańǵyrý» baǵdarlamalyq maqalasynda osy baǵytta kelesi tapsyrmalar berdi. Damyǵan 30 eldiń qataryna qosylamyz desek, rýhanı damýymyz kerek. Árbir qazaqstandyqtyń, óskeleń urpaqtyń óziniń eline, ultyna degen súıispenshiligin oıatý, damytý paryz»,- dedi Aqtóbe oblysynyń ákimi Berdibek Saparbaev. Óńir basshysy forýmǵa jınalǵan aqtóbelikterge oblystyń jetistikterin tizbektep berdi. Máselen, 25 jyl ishinde aqtóbelikterdiń ómir súrý jasynyń uzaqtyǵy 5 jasqa ósip, 72,8 qurady. Halyq sany 15 paıyzǵa artyp, 850 myńǵa jetti. Al Aqtóbe qalasynda 470 myń adam turady.
Forým aıasynda 80 mlrd teńgeden astam somaǵa iri áleýmettik-ekonomıkalyq jobalardy júzege asyrý týraly 20 memorandýmǵa qol qoıylǵanyn atap ótý kerek.
«Táýelsizdik jyldary Aqtóbede 120 mektep, 500-ge jýyq mektepke deıingi mekeme, 150 medıtsına nysany salyndy. Óńirde «Batys Qytaı - Batys Eýropa» halyqaralyq dáliziniń qurylysy bitti. Ótken jyldan bastap Aqtóbe-Atyraý- Astrahan baǵytyndaǵy tasjoldy salý jumysy júrip jatyr. Aqtóbe-Orsk joly da jóndelýde. Bastysy - daǵdarysqa qaramastan negizgi azyq-túlik túrlerine baǵasynyń ósýine jol bergen joqpyz. Elbasy Nursultan Nazarbaev óndiristi jańǵyrtýdy tapsyrdy. Aldaǵy ýaqytta kásiporyndar 400 mıllıard teńgege jańǵyrtý jumystaryn júrgizedi. Tek óndiriste emes, qurylys, aýyl sharýashylyǵy, ınfraqurylym, bıznes sekildi baǵytta jańǵyrtý jumystary júredi»,- dedi óńir basshysy Berdibek Saparbaev.
Forýmǵa qatysqan aqtóbelikter jalpy quny 5 mlrd. teńge bolatyn áleýmettik mańyzy bar jobalarǵa qoldaý bildiretinderin jetkizdi. Olar kómek bilim berý mekemeleriniń materıaldyq-tehnıkalyq bazasyn jańartyp, jetim balalardy turǵyn úımen qamtamasyz etýge, balabaqshalar salýǵa ýáde berdi. Sonymen qatar, «Batyr analarǵa taǵzym» keshenin salý josparda bar.