Berdibek Saparbaev tarazdyq 13 jasar jetim balany qamqorlyǵyna aldy
Oblysta 18 jasqa deıingi barlyǵy 433 myń bala turady. Onyń ishinde 1352 bala jetim jáne ata-anasynyń qamqorlyǵynsyz qalǵan balalar. Osy áleýmettik sanatqa jatatyn 113 bala oblystyń memlekettik mekemelerinde tárbıelenýde.
Jobanyń tusaýkeserine kelgen qonaqtar aldymen Jastar saraıynyń foesinde ázirlengen ómirlik qıyn jaǵdaıdaǵy balalardy qoldaý jónindegi oblystyq ortalyqtyń balalaryna arnalǵan sýretter men qolóner buıymdarynyń kórmesimen tanysty.
«Bizde barlyǵy 70 bala bar, olardyń 49-y osy «Meıirim» jobasyna endi, al búgin kómekke muqtaj alty bala sharaǵa qatysýda», - deıdi ómirlik qıyn jaǵdaıdaǵy balalardy qoldaý ortalyǵynyń dırektory Aıjan Meıirhanova.
«Meıirim» jobasynyń tujyrymdamasyna sáıkes 134 jetim bala oblystyń 87 memlekettik mekemesi men iri kásiporyndarynyń basshylaryna bekitilgen. Memlekettik organdar men bıznes qurylymdardyń basshylary bul balalardy odan ári áleýmettik qamtamasyz etý úshin barlyq jaǵdaı jasaıtyn bolady. Atap aıtqanda, olar balalardyń turǵyn úı jınaq shottaryn kezeń-kezeńimen tolyqtyrýdy uıymdastyrady jáne jan-jaqty qoldaý kórsetedi. Demeýshiler balalardy turaqty jumyspen jáne turǵyn úımen qamtamasyz etý máselelerin sheshedi.
«Búgingi kúnge deıin áleýmettik beıimdeý, bilim berý jáne jumyspen qamtý, otbasyn qurý, jetim balalar men ata-anasynyń qamqorlyǵynsyz qalǵan balalardy, arnaıy mekemelerdiń túlekterin turǵyn úımen qamtamasyz etý sharalary ózekti bolyp qalyp otyr», - dedi tanystyrylym barysynda oblys ákimi Berdibek Saparbaev.
Bul aýqymdy jobanyń maqsaty – áleýmettik jáne quqyqtyq kepildikterdi qamtamasyz etý arqyly jetim balalar men ata-anasynyń qamqorlyǵynsyz qalǵan balalardyń ómir súrý sapasyn jaqsartý. Tarıhqa zer salsaq, Uly Dalada eshqashan jetimder bolǵan emes, alaıda, ujymdastyrý, jappaı qýǵyn-súrgin jáne halyqtardyń Qazaqstanǵa jer aýdarylý, soǵys kezeńindegi qıyndyqtar jetimdik jaǵdaılaryn týdyrdy. Al búgingideı tynysh ári beıbit, toqshylyq kezde biz balalarymyzdyń eshqaısysyna jetimdik taýqymetin tartqyzbaýǵa tısipiz, barshamyz birge olarǵa qamqorlyq tantýymyz kerek. Jobanyń bastamashysy retinde oblys ákimi Berdibek Saparbaev ómirlik qıyn jaǵdaıǵa tap bolǵan balalardy qoldaý ortalyǵynyń tárbıelenýshisi, 6-synyp oqýshysy Albına Qadyrovaǵa ómirlik qoldaý jónindegi áleýmettik kelisimshartqa birinshi bolyp qol qoıdy. Basqa balalar boıynsha osyndaı kelisimderge iri kásiporyndardyń basshylary men aımaqtaǵy bedeldi tulǵalar da qol qoıdy. Olardyń qatarynda «Qazfosfat» JShS bas dırektory Muqash Eskendirov, «Altaıs Grýpp» JShS dırektory Álimbek Jumabaev, «Araıstroımarket-2003» JShS dırektory Arman Edilbaev, «Gaýgartas» meıramhanasynyń dırektory Merýert Leshtaeva jáne taǵy basqalary bar.
Osy kelisimder aıasynda bes balaǵa mıllıon teńgelik sertıfıkattar tabystaldy. Bul aqsha olardyń «Turǵyn úı qurylys jınaq banki» AQ-yndaǵy turǵyn úı jáne jınaq shottaryna túsedi. 18 jasqa tolǵannan keıin ortalyq tárbıelenýshileri olardy jeke turǵyn úı satyp alý úshin paıdalana alady. Oǵan deıin olardyń qamqorshylary múmkindiginshe osy shotty toltyryp otyrady.