Berdibek Saparbaev: Praımerız - demokratııalyq jańǵyrýdyń jarqyn úlgisi
Oblys ákimi óziniń Facebook áleýmettik jelisi arqyly jarııalaǵan Úndeýinde elimizdiń qalyptasyp otyrǵan ahýalǵa toqtalyp, «Nur Otan» partııasy tarapynan atqarylǵaly otyrǵan partııaishilik irikteý sharasyna bylaısha baǵa beredi:
«Qurmetti jerlester!
Qazaq eli qashannan túrli zulmattardy bastan ótkerip, birlik pen qajyr-qaıratynyń arqasynda qıyndyqtarǵa qaıyspaı, eńserip keledi. Búginde kúlli álemdi kúrsintken kesirli kesapatpen de kóp bolyp kúresýdemiz. Shuǵyl sheshimder men júıeli jumystardyń nátıjesinde ahýaldyń ońala bastaǵany baıqalady. Bul turǵyda ýaqytpen sanaspaı eńbek etken sala mamandaryna, qarlyǵashtyń qanatymen sý sepkendeı qol ushyn sozǵan qaıyrymdy jandarǵa, saqtyq sharalaryn saqtap, indettiń taralýyna tosqaýyl qoıǵan turǵyndarǵa aıtar alǵysymyz zor. Ómir kóshi munymen toqtap qalmaıdy. Serpindi damý jolynda strategııalyq maqsattarǵa qol jetkizý úshin saıası úderisterdi iske asyrýdyń tıimdiligi joǵary.
Barshaǵa belgili, 17 tamyzdan bastap elimizde partııaishilik irikteý – praımerız bastaldy. Kúni keshe Elbasy, «Nur Otan» partııasynyń Tóraǵasy Nursultan Ábishuly Nazarbaev bul sharanyń mańyzdylyǵyna toqtalyp, Qazaqstan halqyna Úndeý jarııalady. Áleýmettik lıft qalyptastyrý jolynda ádil báseke ornaıtynyna senim bildirdi. Rasynda da, Táýelsizdik tarıhynda tuńǵysh ret qolǵa alynyp jatqan bastama demokratııalyq jańǵyrýdyń jarqyn úlgisi bolmaq. Óıtkeni, «Myqty lıderler – myqty partııa» qaǵıdaty boıynsha óziniń jáne eliniń bolashaǵyna baıyppen qaraıtyn úmitkerler baq synaıdy. Túıini tarqamaǵan túıtkilder talqylanyp, tıimdi dıalog órbıdi. Sol arqyly qalyń kópshilik elimizdi damytý máselelerine azamattyq aıbynmen atsalysady. Munyń barlyǵy júıeli partııalyq saıasatty qalyptastyrýǵa, bastaýysh partııa uıymdarynyń jumysyn jandandyrýǵa oń septigin tıgizetindigi sózsiz. ıAǵnı, qoǵam ókilderiniń belsendiligin arttyra otyryp, ortaq nátıjege qol jetkizýge basymdyq berilip otyr»,-deıdi oblys ákimi.
Onyń sózinshe, praımerız – Elbasynyń bastamasymen qolǵa alynǵan «Senim. Dıalog. Bolashaqqa nyq qadam» partııa jumysyn qaıta jandandyrý baǵdarlamasymen úndesip jatqan mańyzdy shara. Osy oraıda, partııanyń Jambyl oblystyq fılıaly atalmysh sharany joǵary deńgeıde ótkizý boıynsha birneshe aıdan beri daıyndyq jumystaryn júrgizdi. Bul baǵytta keshendi jospar ázirlenip, uıymdastyrý komıtetteri men esep komıssııalarynyń quramdary jasaqtalǵan. Praımerız tártibin túsindirýge baǵyttalǵan 15 semınar ótip, aýdandyq (qalalyq) fılıal tóraǵalarynyń birinshi orynbasarlary men uıymdastyrý komıtetiniń múshelerine tıisti nusqaýlar berildi.
Búginde óńirde 55 myńǵa jýyq músheni qamtıtyn 266 bastaýysh partııa uıymy bar.
Daýys berý tásili karantın jaǵdaıyn eskere otyryp, onlaın jáne dástúrli túrde ótetin bolady. Onlaın formatynda daýys berý 1-3 qazan aralyǵynda, al, dástúrli daýys berý tásili 3 qazanda ótedi.
Dástúrli daýys berý úshin 177 oryn belgilendi.
«Osylaısha, aımaqta praımerızdi ótkizýge jan-jaqty jaǵdaı jasaldy. Alǵashqy kúnniń ózinde sharaǵa qatysýǵa 33 úmitker ótinish bildirdi. Biz bul tizimniń tolyǵa túskenin, azamattardyń óz múmkindigin múlt jiberip almaýyn qalaımyz. Barlyq shynaıy patrıottardy, bastamashyl jáne jaýapkershiligi mol otandastardy aımaq pen eldi qarqyndy damytý men órkendetý maqsatynda praımerızge belsendi qatysýǵa shaqyramyn!»,-dedi Berdibek Saparbaev.