Berdibek Saparbaev pen Baqyt Sultanov kópbalaly otbasylarmen kezdesti

NUR-SULTAN. QazAqparat - Qazaqstan Respýblıkasynyń Eńbek jáne halyqty áleýmettik qorǵaý mınıstri 23-24 sáýirde Saryarqa jáne Esil aýdandarynyń az qamtylǵan jáne kópbalaly otbasylarymen kezdesti, dep habarlaıdy QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Kezdesýge Densaýlyq saqtaý vıtse-mınıstri L. Aqtaeva, Bilim jáne ǵylym vıtse-mınıstri E. Sýhanberdıeva, QR IIDM Qurylys jáne turǵyn úı-kommýnaldyq sharýashylyq komıtetiniń tóraǵasy M.Jaıymbetov qatysty.

Eńbek mınıstrliginiń basshysy Tuńǵysh Prezıdent - Elbasynyń «Áleýmettik qamqorlyq» bastamasy aıasynda aǵymdaǵy jylǵy 1 maýsymnan bastap 1,1 mıllıon azamattyq qyzmetkerdiń jalaqysy 30 paıyzǵa deıin ósetinin eske saldy.

1 sáýirden bastap jańa formatta ataýly áleýmettik kómek kórsetýge qujattar qabyldaý júrgizilýde, oǵan bıyl 830 myńnan astam adamdy qamtý josparlanýda. Atap aıtqanda, Saryarqa aýdanynda AÁK alýshylar sany 1516-dan 2211 adamǵa deıin, Esil aýdanynda 506-dan 737 adamǵa deıin ósedi. Jalpy, Nur-Sultan qalasy boıynsha jańartylǵan AÁK alýshylar shamamen 7 myń adam bolady.

Budan basqa, «E-Halyq» aqparattyq júıesiniń kómegimen AÁK-ge qujattardy berý tártibi aıtarlyqtaı jeńildetildi. Járdemaqyny alý úshin jeke basyn kýálandyratyn qujat jáne ótinish berý kerek. Júıede qajetti aqparat bolmaǵan kezde jumyspen qamtý ortalyqtarynyń qyzmetkerleri nemese ákimder tıisti memlekettik organdarǵa jazbasha ótinish jasaıdy. Bul rette ótinish berýshi ózi qajetti qujattardy usynýǵa quqyly.

Sonymen birge, Nátıjeli jumyspen qamtýdy jáne jappaı kásipkerlikti damytý «Eńbek» memlekettik baǵdarlamasyna ózgerister engizilýde. Osylaısha, kópbalaly aýyldyqtardyń jumyspen qamtýdy qamtamasyz etý jáne tabysyn arttyrý úshin 505 myń teńge mólsherinde jańa bıznes-ıdeıalarǵa qaıtarymsyz memlekettik granttar beriletin bolady. Sondaı-aq, aǵymdaǵy jyly aýyldaǵy kópbalaly analar men múgedektigi bar adamdar arasynda kásipkerlikti damytýǵa 5 myń mıkrokredıt bólinedi.

Sonymen qatar, kópbalaly az qamtylǵan aýyldyq otbasylar úshin suranysqa ıe mamandyqtarǵa qysqa merzimdi oqytý uıymdastyrylady. Jekelegen jumys túrleri boıynsha jalaqyny sýbsıdııalaýmen úıde áleýmettik jumys oryndary qurylatyn bolady.

Sondaı-aq, Mınıstrlik áleýmettik jaǵdaıy tómen otbasylarǵa jergilikti atqarýshy organdar tarapynan kórsetiletin áleýmettik kómek pen qyzmetterdiń biryńǵaı paketin ázirledi. Áleýmettik pakette jergilikti atqarýshy organnyń qarajaty esebinen áleýmettik qoldaý jáne áleýmettik qyzmet kórsetýdiń 11 sharasy qamtylǵan.

Mınıstr eńbekke qabiletti azamattar tek memlekettiń qoldaýyna súıenip otyrmaı, eńbek etip, óziniń ál-aýqatyn arttyrýy tıis ekenin erekshe atap ótti.

«Men kóp balaly otbasynda óstim. Jas kezimizden biz «ata-anamyzdyń moınynda otyrmas» úshin jumys istedik. Men jaqsy oqydym, sondyqtan joǵary stıpendııa aldym, oqýdan keıin júk tasýshy bolyp jumys istedim, kókónis salynǵan jáshikterdi tıedim. Keıbir adamdar qazir jumys istemeıdi. Jumys joq deıdi, al usynǵan kezde bas tartady. Jas urpaqty bala kezinen eńbekke úıretý kerek», - dedi ol.

Óz sózin qorytyndylaı kele, Berdibek Saparbaev Elbasynyń «Áleýmettik qamqorlyq» bastamasy keshendi sıpatqa ıe, azamattardyń ál-aýqatyn arttyrýǵa baǵyttalǵan uzaq merzimdi maqsattarmen baılanysty ekenin atap ótti.