Berdibek Saparbaev pen Altaı Kólginov elordadaǵy mektep aýlasyna aǵash otyrǵyzdy
Ekologııalyq saǵat búgingi tańda respýblıkanyń barlyq mektepterinde ótip jatyr. Keń kólemdi aktsııany qoldaýǵa Úkimet basshysynyń orynbasary Berdibek Saparbaev pen Nur-Sultan qalasynyń ákimi Altaı Kólginov te atsalysty. Bılik ókilderi №76 mektep-lıtseıdiń jumysymen tanysyp, oqýshylardyń aldynda sóz sóıledi.
«Adamnyń densaýlyǵynyń myqty bolýy, uzaq ómir súrýi – ishetin sýyna, jutatyn aýasyna baılanysty. Aldymyzdaǵy 6 qazan kúni dúnıejúzilik tirshilikti qorǵaý kúni atalyp ótedi. Sonyń qarsańynda Qazaqstan Úkimeti barlyq ákimdiktermen birigip, mektepterde eko-saǵat ótkizip jatyr. Búgingi tańda bul aktsııa Qazaqstannyń 7 myń mektebinde ótkiziledi. 3 mıllıonǵa jýyq oqýshy osy saǵatqa qatysady. Tabıǵatty qorǵaý – kishkentaı baladan bastap eńkeıgen qarttyń moınyndaǵy mindet. Qazaqta «artyńda mal qalǵansha, tal qalsyn» degen sóz bar. Taldyń qandaı mańyzy baryn sizder bilesizder. Aýamyz taza bolý úshin ottegi kóp bolýy kerek. Ottegini aǵashtar men gúlder shyǵarady. Sondyqtan, ata-babamyzdan bizge kele jatqan uǵymǵa adal bolýymyz kerek», - dedi mekteptiń kontsert zalynda oqýshylardyń aldynda sóz sóılegen Berdibek Saparbaev.
Úkimet basshysy oqýshylarǵa únemdi bolýǵa shaqyrdy. Aıtýynsha, sý, jaryq – bári de tıimdi paıdalanýy kerek. Premer-mınıstr orynbasarynyń sózin qostaǵan shahar basshysy Altaı Kólginov te ekologııalyq saǵattyń basty mańyzyn túsindirdi.
«Eń bastysy, bul - tárbıe, mádenıet. Qala degen – ortaq úı. Bárimiz bir memlekettiń – úlken otbasynyń múshesimiz. Aldymen, tárbıeli ári mádenıetti bolýymyz kerek. Kezinde Ál-Farabıdiń «Tárbıesiz bilim – adamzattyń qas jaýy» ekenin aıtyp ketkenin bilesizder. Mádenıetimiz – ózimizdiń tárbıemiz. Prezıdentimiz Qasym-Jomart Kemeluly eko-chellenjdi bastady. Qarasaq, elorda mańyndaǵy kól jaǵalarynyń barlyǵynda qoqys shashylyp jatyr. Ol qoqysty ózge planetadan bireý ákelip tastaǵan joq qoı. Bir qýantqany, stýdentter, jastar kelip, aınalamyzdaǵy kólderge baryp, mańaıyn tazartyp berdi. Uıada ne kórse, ushqanda sony iledi deıdi. Tap solaı – aınalamyzdyń taza bolýy siz ben bizge baılanysty», - dedi Altaı Kólginov.
Osydan keıin Berdibek Saparbaev men Altaı Kólginov №76 mekteptiń aýlasyna oqýshylarmen birge aǵash otyrǵyzdy. Úkimet basshysynyń orynbasary aǵash otyrǵyzý kezinde oqýshylarǵa «tal egý bir bólek – ony kútip-baptaý ekinshi mindet» ekenin eskertti.