Berdibek Saparbaev: Osy kúnge kimderdiń arqasynda jetkenimizdi umytpaý kerek
Oblys ákimi Berdibek Saparbaev aqtóbelikterdi merekemen quttyqtady, dep habarlaıdy QazAqparat tilshisi.
Aqtóbelikter Jeńis kúnin «Dańq» obelıski, Álııa Moldaǵulovanyń memorıaldyq kesheni, Batyrlar alleıasy, Álııa Moldaǵulovanyń bıýsti, «Zeńbirek» eskertkishi, Baýyrlastar zıratyna gúl qoıýmen bastady. Atasy men ákesin, baýyrlaryn eske alǵandardy oblys ákimi Berdibek Saparbaev quttyqtady.
«Búgin - tarıhı jeńisti kún. Bul - surapyl, qaıǵyly, qasiretti, uzaq jylǵa sozylǵan soǵysty jeńgen kún. Adamzat tarıhynda mundaı soǵys bolǵan emes. Soǵysta tek birlik, yntymaq, qajyrlylyq, qaırat jeńiske jetýi kerek edi. Sol kezdegi keńes halqy bir otbasydaı birigip, tórt jyl boıy fashıstermen soǵysyp, ózderiniń erlikteriniń, qajyrlylyqtarynyń arqasynda jeńiske jetti. Kishkentaı baladan bastap, aqsaqal, keıýanaǵa deıin Otan úshin, el úshin, bolashaq úshin dep soǵysty, eńbek etti. Bizdiń aǵalarymyz ben apalarymyz, 5-6 jastaǵy balalar men qyzdar soǵysty tamaqpen, kıim-keshekpen, qarý-jaraqpen, oqpen qamtamasyz etti. Osyndaı erlikterdi umytýǵa bola ma? Biz, qazirgi zamannyń urpaǵy osy zamanǵa, táýelsizdikke, damýǵa kimderdiń arqasynda jetkenimizdi umytpaýymyz kerek»,- dedi Berdibek Saparbaev.
Búgin ár aqtóbelik atasyn, ákesin, maıdanǵa attanyp, elge oralmaǵan baýyryn eske aldy. Aqtóbe oblysynan 122 myń 423 adam soǵysqa qatysty. Onyń 36 myńnan astamy elge qaıtyp oralǵan joq. Aqtóbeden 35 Keńes Odaǵynyń batyry, 9 «Dańq» ordeniniń tolyq kavaleri shyqty. Al 15 myń jaýynger ordender men medalder aldy.
«Aqtóbelikterdiń endigi mindeti - soǵys ardagerlerine bas ıip, qalǵan ómirlerin jaqsy ótkizýge bar múmkindik jasaý. Búgin kishkentaı balalardyń qolyna ata, ájeleriniń sýretin alyp, áskerı kıinip turǵanyn kórdik, kóńilimizge jaqsy sezim ornyqty. Balalarymyzdy osylaı tárbıeleýimiz kerek. Soǵys ardagerlerin, eńbek ardagerlerin jeńis kúnimen quttyqtap, densaýlyq tileımiz»,- dedi Berdibek Saparbaev.