Berdibek Saparbaev: Ońtústiktegi aǵaıyndy soltústikke shaqyryńyzdar
Úkimet músheleri Qostanaı aýdanynyń Zatobol jáne Mıchýrın aýyldarynda turatyn kópbalaly otbasylarǵa bardy. Sonyń biri - mektep jasyndaǵy 6 balasy bar Mıhaılovtar otbasy. Olar Zatobol aýylyndaǵy jer úılerdiń birinde turady. Otaǵasynyń aıtýynsha, olar aı saıyn ákimdikten materıaldyq kómek alady. Jergilikti bılik byltyr bul otbasyǵa qysqy otyn alý úshin de qarajat bólgen. Endi Gúlshara Ábdiqalyqova úıdiń shatyryn jóndeý jáne terezelerin aýystyrýda kómek kórsetilýi kerek ekenin aıtyp, ákimdikke tapsyrma berdi.
Vıtse-premer Mıchýrın aýylynda turatyn Kımder otbasyna da at basyn burdy. Olar bes qyzdy tárbıelep otyr. Qyzdardyń barlyǵy sabaqty jaqsy oqıdy. Bul otbasy úıdi keńeıtý úshin ákimdikke ótinish jazǵan.
«Oblystaǵy koreı etno-mádenı birlestigi Kımder otbasyn qamqorlyqqa aldy. Qujattary daıyn. Endi 4 qosymsha bólme salyp beremiz. Qazir úıdiń kólemi 28 sharshy metr bolsa, endi ol 70 sharshy metrge deıin ulǵaıady. Aldaǵy úsh aı jazda qurylys jumystaryn tolyǵymen aıaqtaımyz», - dedi «BK-Stroı» qurylys kompanııasynyń dırektory Valerıı Poleshko.
Al Gúlshara Ábdiqalyqova balalardyń ósip kele jatqanyn aıtyp, úı ıesine jeke kásip ashýǵa keńes berdi.
«Bes balańyz da ósip qalypty. Olardyń jaǵdaılarynyń jaqsy bolýy sizge tikeleı baılanysty. Sol sebepti, óz kásibińizdi ashyńyz. Qazir tegin oqý kýrstary bar. Sizge jergilikti bılik kómektesedi», - dedi QR Premer-Mınıstriniń orynbasary.
Budan keıin Úkimet ókilderi Rýdnyı qalasyndaǵy kópbalaly Myrzataevtar otbasyna bardy. Bul januıada alty bala ósip keledi. Otaǵasy Ábish Myrzataev qoǵamdyq kólik júrgizýshisi bolyp jumys isteıdi. Al jary Indıra Nazarova ázirge úı sharýasynda. Otbasy birneshe jyl buryn Túrkistan oblysynan Nur-Sultan qalasyna kóship kelgen. Alaıda, otaǵasy jumys babymen kenshiler qalasyna qonys aýdardy. Munda olar ataýly kómekke ıe bolyp otyr. Baspana kezegine de turdy.
«Sizderge ońtústiktegi Jetisaıdyń ystyǵynan soń soltústiktiń sýyǵana úırený ońaı emes. Klımat adamǵa áser etedi. Endi bul jerde ulttyq qundylyqty saqtaýda, memlekettik tildiń qanat jaıýyna úlesterińizdi qosyńyzdar. Ońtústiktiń eńbekkerligi men mádenıetin kórsetý kerek. Qajet bolsa, Jetisaıdaǵy jurtty Rýdnyıǵa shaqyryńyzdar!» - dep keńes berdi Berdibek Saparbaev.
Qostanaı oblysy ákiminiń orynbasary Marat Júndibaevtyń málimetinshe, óńirde «Baqytty otbasy» jobasy sátti iske asyrylýda. Osy ýaqytqa deıin 2 myńnan astam otbasyǵa materıaldyq kómek kórsetildi. Sonymen qatar demeýshiler kópbalaly 14 otbasyǵa páter satyp alyp bergen.
Eske salsaq, Gúlshara Ábdiqalyqova keshe de kópbalaly otbasylarmen kezdesti. Sonyń biri - Shákirovtar otbasyna metsenat Igor Kım úsh bólmeli páter alyp bergenin habarlaǵan bolatynbyz.
Búgin Úkimet músheleri Rýdnyı jumysshylarymen kezdesti.