Berdibek Saparbaev Mońǵolııa ǵalymdaryn tarıhı zertteýlerge qatysýǵa shaqyrdy
Aıta keteıik, bul sharaǵa Monǵolııa Premer-mınıstriniń orynbasary Ólzıısaıhany Enhtúvshın, memleket jáne qoǵam qaıratkeri Myrzataı Joldasbekov, Mońǵolııanyń Qazaqstandaǵy elshiligi ókilderi, birqatar ǵylymı mekemelerdiń basshylary, zııaly qaýym ókilderi qatysty.
«Tarıhty jaqsy jaqsy bilesizder, bizdiń babalarymyz osy Uly dalada týyn tigip, ordalardyń altyn qazyǵyn qaqqan. Bıylǵy jáne aldaǵy jyl bizdiń qazaq eli úshin úlken tarıhy mańyzdy kezeń bolmaqshy. Memleket basshysy tısti sheshim qabyldap, Úkimetke tapsyrmalar júktedi. Osy oraıda Altyn Ordanyń 750 jyldyǵyna erekshe ekpin qoıylǵan. Atap aıtqanda, bul baǵytta birqatar is-sharalar uıymdastyrylyp keledi. Ondaǵy maqsatymyz – ózimizdiń ǵalymdardy, mamandardy, sondaı-aq kórshiles elderdiń ǵalymdaryn biraz aýqymdy zertteýlerge tartý, qazba jumystaryn júrgizý, ózge memleketterde ǵylymı-tájirıbelik konferentsııa ótkizý. Bul turǵyda Altyn Orda memleketiniń tarıhyn barsha dúnıejúzine keńinen tanytý mindeti qoıylyp otyr», - dedi Saparbaev.
Úkimet basshysynyń orynbasary bul baǵyttaǵy jumystarda Halyqaralyq Túrki akademııasynyń róli erekshe ekenin atap ótti.
«Bul akademııanyń quryltaıshylary retinde bizdiń memleketten basqa ózge de elder enip otyr. Sonymen qatar, baqylaýshy memleket te bar. Bizdiń tarıhymyz ejelden ózara baılanysta jatyr, Mońǵolııamen alys emespiz. Sondyqtan Enhtúvshın myrza, sizderdi osy akademııaǵa baqylaýshy bolýǵa shaqaramyn», - dedi B. Saparbaev Mońǵolııa vıtse-premerine qarata aıtqan sózinde.
Bul turǵyda QR Premer-Mınıstriniń orynbasary Altyn Ordanyń 750 jyldyǵy aıasynda týrızmdi damytýǵa aıryqsha mán berilip otyrǵandyǵyn atap ótti. Osy sharalar aıasynda qajetti jumystar bastalyp ketti.
«Atqarylatyn jumystarǵa Mońǵolııa tarapynyń da qatysýyn usynamyz. Óıtkeni tarıhı qundylyqtar, eskertkishter sizderdiń elderińizdiń aýmaǵynda kóptep kezdesedi. Bizdiń ǵalymdar Mońǵolııanyń mamandarymen birge jumys isteıtin bolsa, ózimizdiń tarıhymyzdy álemge keńinen kórsete alamyz», - dedi B. Saparbaev.
Búgingi shara barysynda Altyn Orda tarıhyna qatysty birneshe kitaptyń tanystyrylymy ótti. Zııaly qaýym ókilderi Mońǵolııadan arnaıy kelgen Ólzıısaıhany Enhtúvshın myrzaǵa shapan jaýyp, qamshy syılady.
Eske sala ketsek, 2019 jyldyń 24 tamyzynda ótken «Ulytaý – 2019» halyqaralyq týrıstik forýmyna qatysqan Memleket basshysy Qasym-Jomart Toqaev Altyn ordanyń 750 jyldyǵyn merekeleý aıasynda birqatar jumys jasalý kerektigin atap ótken edi.
Prezıdent Altyn ordanyń negizin qalaǵan Joshy hannyń esimin ulyqtaýdy mindetti túrde qolǵa alýdy usyndy. Onyń aıtýynsha, Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeıdi.